Një grua ka vdekur pasi është qëlluar me armë zjarri jashtë një bari në qendër të qytetit të Sheffieldit, në Anglinë veriore. 30-vjeçarja u gjet e plagosur rëndë jashtë barit One Four One, në West Street. Policia dhe ndihmësit mjekësorë i dhanë ndihmën e parë në vendngjarje përpara se të dërgohej në spital, ku më vonë ndërroi jetë për shkak të plagëve të marra.
Tre persona janë arrestuar në lidhje me incidentin, një burrë 30-vjeçar dhe një grua 32-vjeçare u arrestuan pranë Stockport në orët e para të mëngjesit të sotëm, ndërsa një tjetër burrë 30-vjeçar u arrestua në Sheffield. Të tre mbetën në paraburgim të hënën për t’u marrë në pyetje. Ndërsa gruaja nuk është identifikuar ende zyrtarisht, familja e saj është informuar, sipas Policisë së South Yorkshire.
Ndihmës Shefi i Policisë Colin McFarlane tha: “Ky është një incident tragjik që ka rezultuar në vdekjen e një gruaje të re gjatë një daljeje në Sheffield gjatë një fundjave.” Ai shtoi se policia do të mbajë një “prani të fortë në zonë sot dhe gjatë ditëve në vijim”. West Street është mbyllur midis Mappin Street dhe Westfield Terrace, ndërsa Eldon Street, Westhill Lane dhe një pjesë e Orange Street janë gjithashtu të mbyllura.
Policia u ka kërkuar shoferëve të shmangin zonën. Autoritetet thanë se u thirrën për raportime për të shtëna jashtë barit One Four One në qendër të qytetit të Sheffieldit rreth orës 2:45 të mëngjesit të hënën. Policia nuk ka konfirmuar nëse ka pasur viktima të tjera. Në një deklaratë, ata thanë: “Jemi të vetëdijshëm se ky incident po shkakton shqetësim në komunitetet lokale dhe do të japim përditësime të mëtejshme sapo të jemi në gjendje. Do të donim t’ju falënderonim për durimin tuaj ndërsa punojmë në vendngjarje.”
