Vdekja e papritur e këngëtarit të njohur shqiptar, Shpat Kasapi, ka kaluar kufijtë e rajonit dhe ka tërhequr vëmendjen e mediave prestigjioze ndërkombëtare. Tabloidi britanik DailyMail i ka dedikuar një artikull të gjatë artistit, duke e përshkruar si një nga figurat më të dashura të skenës muzikore shqiptare dhe kosovare.

DailyMail shkruan se Shpat Kasapi, 40 vjeç, humbi jetën pas një ataku të papritur në zemër në Monza të Italisë, ku ndodhej së bashku me bashkëshorten, Selvije Jao, për të kërkuar ndihmë mjekësore për djalin e tyre të vogël, Roelin.

Lajmi për ndarjen e tij nga jeta u pasqyrua edhe nga Daily Star, ndërsa vetë Selvije ishte ajo që ndau publikisht dhimbjen e madhe në rrjetet sociale. DailyMail citon postimin prekës të saj, ku ajo rrëfen se Shpati “vdiq në krahët e saj” dhe se sa shumë kishin luftuar për të mbrojtur privatësinë e familjes. Pse m’u thye zemra kështu, i dashur?”, ishte një nga mesazhet më të forta që tabloidi britanik veçoi nga reagimi i saj.

Media britanike solli në vëmendje edhe reagimin e Bebe Rexhës, e cila nderoi Kasapin duke publikuar një video të tij duke kënduar, shoqëruar me një emoji pëllumbi dhe flamurin shqiptar, një gjest që u interpretua si homazh për artistin dhe rrënjët e tyre të përbashkëta shqiptare.

DailyMail bëri edhe një profil të karrierës së Shpat Kasapit, duke e cilësuar atë si një artist me shumë hite që u bë i famshëm në fillim të viteve 2000 me këngë si “Ajo më mungon”, “Valle Kosovare”, “Dashni pa limit” dhe “Aroma e saj”. Ata theksuan se projekti i tij më i fundit, “N’dahëm sot”, po i afrohej një milioni klikimeve në YouTube, ndërsa në Spotify numëronte afro 340 mijë dëgjues mujorë.

Në artikull u rikujtua edhe pjesëmarrja e tij në konkurrimin për përfaqësimin e Shqipërisë në Eurovision në vitin 2009, ku Kasapi garoi, por u mund nga Kejsi Tola me këngën “Carry Me in Your Dreams”.

DailyMail e mbylli shkrimin duke e përshkruar Shpat Kasapin si një figurë të dashur, të respektuar dhe pjesë të pandashme të muzikës shqiptare, ndërsa vdekja e tij shihet si një humbje e madhe për familjen, miqtë dhe publikun që e ka ndjekur për më shumë se dy dekada.