Vetëm tre lojtarë në historinë e futbollit kanë marrë pjesë në gjashtë Kupa Bote, një arritje që dëshmon talent, përkushtim dhe jetëgjatësi të jashtëzakonshme në nivelet më të larta të futbollit.
Lionel Messi (Argjentinë) – 2006, 2010, 2014, 2018, 2022 dhe 2026.
Cristiano Ronaldo (Portugali) – 2006, 2010, 2014, 2018, 2022 dhe 2026.
Guillermo Ochoa (Meksikë) – pjesë e Botërorëve 2006, 2010, 2014, 2018, 2022 dhe 2026.
Një rekord historik që vështirë se do të thyhet së shpejti, duke i vendosur këta tre emra në elitën e përjetshme të futbollit botëror. Faza e grupeve e Kupës së Botës 2026 premton spektakël që në ditët e para të turneut, sipas “Football Muse”. Me 72 ndeshje të planifikuara nga 11 deri më 27 qershor, tifozët do të kenë mundësinë të ndjekin një maratonë futbolli, ku disa përballje spikasin si më të rëndësishmet dhe më tërheqëset e kësaj faze. Mes rivaliteteve historike, skuadrave favorite dhe pretendentëve për surprizë, këto janë pesë ndeshjet që pritet të tërheqin vëmendjen më të madhe.
Një nga duelet më intriguese të fazës së grupeve do të luhet më 16 qershor në Nju Xhersi, ku Franca përballet me Senegalin. Kjo ndeshje rikthen në kujtesë Botërorin e vitit 2002, kur Senegali shkaktoi një nga surprizat më të mëdha në historinë e turneut, duke mposhtur kampionët në fuqi të Francës në ndeshjen hapëse. Më shumë se dy dekada më vonë, dy kombëtaret takohen sërish në një duel që premton intensitet dhe emocione, veçanërisht në një grup të cilësuar nga shumë analistë si “grupi i vdekjes”.
Më 17 qershor, Dallasi do të presë edhe një tjetër sfidë të madhe, atë mes Anglisë dhe Kroacisë. Përballja sjell menjëherë në kujtesë gjysmëfinalen e Botërorit 2018, kur kroatët eliminuan anglezët dhe siguruan biletën për në finalen historike. Nën drejtimin e Thomas Tuchel, Anglia synon të hakmerret për atë disfatë dhe të konfirmojë statusin e saj si një nga pretendentet kryesore për trofeun.