Një djalë i apasionuar pas shpejtësisë, është dënuar me burg pasi arriti shpejtësinë prej 191 miljesh në orë (rreth 307 km/h) në një autostradë.
Futbollisti gjysmë-profesionist, Connor Charlton, filmoi shpejtësimatësin e BMW X3M-së së tij të modifikuar dhe e publikoi videon në rrjetet sociale.
Një tjetër video e tregonte atë duke hyrë e dalë mes makinave në trafik me shpejtësi 160 milje në orë (rreth 257 km/h), me SUV-in që kushton 90 mijë paund.
Babai i dy fëmijëve e shoqëroi videon me përshkrimin “wow”, së bashku me një emoji duke qeshur.
Në video të tjera, ai arriti shpejtësinë 157 milje në orë (rreth 253 km/h) teksa u nis me shpejtësi nga një semafor i kuq, ndërsa një mik e filmoi duke bërë “drift” rreth një rrethrrotullimi.
Në një moment rrëqethës, ku Charlton doli përpara një furgoni të bardhë, duke rrezikuar të shkaktonte një përplasje, një person dëgjohet duke thënë: “Uau, uau, uau!”, përpara se të shpërthente në të qeshura.
BMW-ja e tij u sekuestrua përfundimisht nga policia pasi ai u përfshi në një aksident në shtator të vitit 2023.
Hetimi zbuloi një shënim në telefonin e tij, ku kishte shkruar një histori të sajuar për aksidentin, duke pretenduar se faji ishte i një drejtuesi tjetër dhe se ai ishte larguar nga vendngjarja.
Një kontroll i kompjuterit të makinës tregoi se ajo kishte regjistruar shpejtësi mbi 107 milje në orë (rreth 172 km/h) në tetë raste brenda një viti.
Charlton, 32 vjeç, u akuzua për dhjetë vepra të drejtimit të rrezikshëm të automjetit dhe katër vepra për pengim të drejtësisë, pasi kishte organizuar që persona të tjerë të merrnin përsipër pikët e penalizimit në patentë në vend të tij.
