Një moment i pazakontë shoqëroi performancën e Katy Perry-t në festivalin muzikor Isle of MTV në Maltë, kur këngëtarja mbeti përkohësisht e bllokuar brenda një shisheje gjigante plastike, pjesë e skenografisë së koncertit.

Sipas programit të performancës më 22 korrik, Perry duhej të hynte në shishen e fryrë, ndërsa fansat do ta rrotullonin atë drejt skenës. Megjithatë, publiku e shtyu aksidentalisht në drejtimin e kundërt, duke e larguar nga pika ku duhej të përfundonte.

Videot që qarkullojnë në rrjetet sociale tregojnë këngëtaren duke qeshur dhe duke bërë gjeste drejt skenës për t’i udhëzuar fansat ta kthenin shishen në drejtimin e duhur, ndërsa vazhdonte të performonte këngët “Hot N Cold” dhe “I Kissed a Girl”.

Pas disa çastesh, publiku arriti ta rikthente shishen drejt skenës dhe koncerti vijoi normalisht, pa incidente të tjera.