Pas tetë vitesh së bashku dhe një vajze të përbashkët, historia e dashurisë mes aktorit të njohur Mario Cimarro dhe modeles sllovake Bronislava Gregušová, e njohur si Broni Gregus, ka marrë fund. Vetë modelja ka thyer heshtjen pas muajsh spekulimesh, duke konfirmuar se procesi i divorcit është ende në vazhdim. Përmes një deklarate të publikuar në InstaStory, Broni tregoi gjithashtu se është larguar nga Shtetet e Bashkuara së bashku me vajzën e tyre trevjeçare, Brianna, dhe është zhvendosur në Sllovaki pas një vendimi të gjykatës.
“Të dashur miq, duke qenë se shumë prej jush më pyesin se si jemi, doja të bëja një njoftim zyrtar. Procesi i divorcit vazhdon dhe Bri dhe unë, falë vendimit të gjykatës, më në fund ndodhemi në Sllovaki. Jemi të dyja jashtëzakonisht të lumtura këtu dhe gati për një fillim të ri”, shkroi modelja.
Pa zbuluar detaje të tjera rreth ndarjes, ajo la të kuptohej se tashmë po përpiqet të ndërtojë një kapitull të ri pranë familjarëve dhe miqve të saj. Pas deklaratës, Broni falënderoi ndjekësit për mesazhet e shumta të mbështetjes që kishte marrë. Largimi i saj nga Shtetet e Bashkuara duket se kishte nisur disa javë më parë. Më 19 qershor, modelja kishte publikuar një fotografi nga avioni së bashku me vajzën, por në atë moment nuk kishte dhënë asnjë shpjegim për situatën ligjore apo për marrëdhënien me aktorin.
Ndërkohë, Mario Cimarro nuk ka reaguar publikisht lidhur me procesin e divorcit. Broni ka fshirë nga profili i saj fotografitë me aktorin, ndërsa Cimarro vazhdon të mbajë disa prej postimeve të përbashkëta. Fotot e fundit të çiftit në profilin e tij lidhen me ditëlindjen e tretë të vajzës së tyre, të festuar në gusht të vitit 2025.
Prej disa muajsh, mungesa e daljeve të përbashkëta dhe heshtja e tyre në rrjetet sociale kishin ngritur dyshime se marrëdhënia po kalonte një krizë. Tashmë, deklarata e Broni Gregus konfirmon se çifti po i jep fund martesës dhe se ajo ka nisur një jetë të re me vajzën në vendlindjen e saj. Mario Cimarro është një nga aktorët më të njohur të telenovelave latine edhe për publikun shqiptar. Roli që e bëri veçanërisht të famshëm ishte ai i Juan Reyes Guerrero në serialin “Pasión de Gavilanes”, ku interpretoi vëllain e madh të familjes Reyes.