Jordan Brook, i njohur nga emisioni The Only Way is Essex, ka zbuluar se po përballet me një gjendje të rëndë shëndetësore pasi është diagnostikuar me meningjit viral dhe encefalit, dy infeksione që prekin drejtpërdrejt trurin dhe sistemin nervor.
Ai u dërgua me urgjencë në spital në fillim të muajit pasi u përball me një sëmundje misterioze që i përkeqësoi gjendjen shëndetësore. Pas javësh analizash intensive dhe trajtimi të vazhdueshëm, mjekët arritën në përfundimin se bëhej fjalë për dy viruse që sulmojnë të njëjtën zonë të trupit, duke shkaktuar inflamacion të trurit dhe membranave që e rrethojnë atë.
Në një video nga shtrati i spitalit, Brook shpjegon se gjendja nuk është aspak e lehtë dhe se përballet çdo ditë me vështirësi, ndërsa ënjtja në tru vazhdon të përkeqësohet. Ai ka kaluar një sërë ekzaminimesh si skanerë, rezonancë magnetike dhe ndërhyrje të tjera mjekësore, ndërsa ndodhet nën trajtim intensiv me medikamente antivirale dhe monitorim të vazhdueshëm.
Mjekët kanë paralajmëruar se këto sëmundje mund të jenë potencialisht kërcënuese për jetën, pasi shkaktojnë inflamacion serioz në tru dhe në palcën kurrizore. Në disa raste, nëse nuk trajtohen në kohë, mund të sjellin pasoja të rënda apo dëmtime të përhershme.
Pavarësisht gjendjes së vështirë, Brook shprehet i vendosur për të luftuar dhe për t’u rikthyer pranë familjes së tij. Ai thekson se synimi i tij kryesor është të shërohet dhe të jetë pranë partneres së tij dhe fëmijës që pritet të vijë në jetë, duke e konsideruar këtë betejë si një sfidë që nuk do ta mposhtë.