Kim Kardashian ka shqetësuar fansat pasi zbuloi se duhet t’i nënshtrohet një ndërhyrjeje kirurgjikale për të hequr disa ndryshime të pazakonta të zbuluara në ezofag, pas diagnostikimit me ezofagit. Në episodin e 29 tetorit të spektaklit The Kardashians, 46-vjeçarja tregoi se kishte konsultuar disa mjekë dhe se problemi shëndetësor ishte kthyer në një shqetësim të vazhdueshëm për të.
Frika e saj lidhet drejtpërdrejt me historinë tragjike të familjes. Babai i saj, Robert Kardashian, ndërroi jetë në vitin 2003, në moshën 59-vjeçare, si pasojë e kancerit të ezofagut. Kim pranoi se kishte zgjedhur të mos ua tregonte shumë njerëzve problemin shëndetësor, pikërisht sepse i rikthente kujtimet e dhimbshme të humbjes së babait.
Në pamjet paralajmëruese të episodit të ardhshëm, ajo shfaqet duke hyrë në spital, ndërsa shpjegon se mjekët kanë rekomanduar heqjen e ndryshimeve të konstatuara në ezofag. Pranë saj ndodhet edhe nëna, Kris Jenner, e cila përpiqet ta qetësojë. Ezofagiti është një inflamacion i mukozës së ezofagut, që mund të shkaktohet nga refluksi acid ose faktorë të tjerë. Megjithëse është një gjendje e ndryshme nga kanceri, disa forma të inflamacionit kronik mund të shoqërohen me rritje të rrezikut për komplikacione. Deri tani, nuk ka asnjë konfirmim se Kim Kardashian vuan nga kanceri. Ndërhyrja kirurgjikale është njoftuar për trajtimin e ndryshimeve të zbuluara nga mjekët.