Një zbulim i rrallë paleontologjik është bërë në ishullin grek të Kretës, ku studiuesit kanë nxjerrë nga toka mbetjet e një rinoceronti që ka jetuar rreth 8 milionë vjet më parë. Gjetjet u zbuluan në mars gjatë kërkimeve paleontologjike në Sitia Geopark, në pjesën verilindore të ishullit.
Mes fosileve të gjetura ndodhet një kafkë e fosilizuar, si dhe pjesë të tjera të skeletit të një kafshe të identifikuar si Dihoplus pikermiensis. Pas zbulimit, materialet u transportuan në laboratorin e Universitetit të Patras në Greqi, ku u pastruan dhe u konservuan me kujdes. Pikërisht gjatë ekzaminimeve laboratorike u konfirmua se kafka i përkiste një rinoceronti.
Dihoplus pikermiensis ishte një rinoceront i madh me dy brirë që jetonte gjatë periudhës së Miocenit të vonë. Në atë kohë, kjo specie ishte pjesë e faunës së njohur si “Pikermian”, një grup kafshësh që përhapej në pjesë të mëdha të Euroazisë Perëndimore. Tre dhëmballë të ruajtura në pjesën e majtë të nofullës së sipërme mund t’u japin shkencëtarëve të dhëna të rëndësishme mbi ushqimin dhe mënyrën e jetesës së kësaj kafshe prehistorike.
Fosilet u pastruan dhe u konservuan në laboratorin e Universitetit të Patras, ndërsa kërkuesit vijojnë analizat për të mësuar më shumë rreth rinocerontit dhe mjedisit ku ai ka jetuar. Zbulimi konsiderohet veçanërisht interesant për historinë natyrore të Kretës, pasi dëshmon praninë e një specieje të lashtë që ka banuar në këtë rajon miliona vite më parë.
Zona ku u gjetën fosilet është pjesë e Rrjetit Global të Gjeoparqeve të UNESCO-s. Në territorin e Sitia Geopark janë ruajtur gjurmë të jetës së kaluar që shtrihen në një periudhë prej gati 300 milionë vitesh, duke e bërë atë një zonë me rëndësi të veçantë për kërkimet paleontologjike dhe gjeologjike.