Automjeti tip “Porsche”, i sekuestruar nga Policia e Tiranës në kuadër të hetimeve për zhdukjen e Eglant Koçit, konsiderohet një nga provat më të rëndësishme të dosjes që po hetohet nga strukturat e krimeve të rënda. Mjeti dyshohet se është përdorur nga Armand Shakaj, personi i shpallur në kërkim dhe i dyshuar si i përfshirë në ngjarje.
Burime pranë hetimit bëjnë me dije se gjatë kontrollit të automjetit janë gjetur disa mjete pune, përfshirë lopata me gjurmë dheu. Ky zbulim ka shtuar dyshimet e hetuesve se pas zhdukjes së 34-vjeçarit mund të jetë tentuar fshehja e trupit në një zonë të largët dhe të vështirë për t’u aksesuar.
Prej disa ditësh, forcat e policisë po zhvillojnë kontrolle intensive në terrene malore dhe zona të izoluara në kufirin mes qarqeve të Tiranës dhe Elbasanit. Operacioni i kërkimit po mbështetet edhe nga njësi të specializuara nga Kosova, të cilat po asistojnë me qen gjurmues në përpjekjet për gjetjen e trupit.
Drejtori i Policisë së Tiranës, Oliger Torba, deklaroi se hetimi ka kaluar në një fazë të avancuar dhe po ndiqet nga një grup i posaçëm hetimor. Sipas tij, informacionet e para janë siguruar pas kallëzimit të familjarëve të Eglant Koçit, ndërsa më pas çështja është marrë në administrim nga strukturat e specializuara të policisë.
Autoritetet bëjnë me dije se janë kontrolluar dhjetëra zona që konsideroheshin me interes për hetimin, por deri tani nuk është arritur të gjendet asnjë gjurmë konkrete që të çojë në lokalizimin e trupit.
Një nga pistat kryesore që po verifikohet lidhet me lëvizjet e automjetit të dyshuarit pas zhdukjes së Koçit. Sipas hetuesve, ekzistojnë dyshime se mjeti është transportuar me karrotrec drejt zonës së Ibës, nën pretendimin e një defekti teknik. Kjo lëvizje po analizohet me kujdes, pasi zona në fjalë ka mungesë të kamerave të sigurisë, çka mund të ketë favorizuar fshehjen e provave.
Ndërkohë, grupi hetimor po heton edhe motivet që mund të kenë çuar në konfliktin e dyshuar mes Armand Shakajt dhe Eglant Koçit. Sipas informacionit të mbledhur deri tani, vëmendja është përqendruar te aktivitetet e lidhura me kriptovalutat dhe te mosmarrëveshjet financiare mes palëve.
Hetuesit po verifikojnë të dhëna sipas të cilave Shakaj dyshohet se ishte i përfshirë në huadhënie me interes, ndërsa Koçi mund të ketë luajtur rol ndërmjetësues në disa transaksione financiare. Një nga skenarët që po shqyrtohen është ai i një borxhi të pashlyer, i cili mund të ketë shkaktuar përplasje të forta mes dy miqve.
Megjithatë, autoritetet theksojnë se të gjitha pistat mbeten në fazë verifikimi dhe se përfundimet do të bazohen vetëm në provat që do të sigurohen gjatë vijimit të hetimeve.