Profesionet në sektorin e kujdesit shëndetësor konsiderohen ndër më tërheqëset për ata që kërkojnë një partner romantik.

Këtë e tregon një studim i ri, i cili thekson se profesione si mjekët dhe infermierët lidhen shpesh me cilësi shumë të vlerësuara në një marrëdhënie, si inteligjenca, stabiliteti dhe kujdesi për të tjerët.

Studimi u realizua me 1,000 burra dhe 1,000 gra beqarë për të identifikuar profesionet që perceptohen si më tërheqëse për një partner. Rezultatet treguan se 29% e të anketuarve e rendisin sektorin e shëndetësisë në vendin e parë.

Kur u analizuan profesionet specifike, mjekët u konsideruan profesioni më tërheqës nga 26% e pjesëmarrësve, ndërsa infermierët u renditën në vendin e tretë me 22%.

Në listën e profesioneve të preferuara përfshihen gjithashtu:

-avokatët – 24%

-profesionet në arsim – 23%

-shkencëtarët – 16%

-farmacistët – 15%

–profesionet në teknologji – 14%

Diferencat mes burrave dhe grave?

Studimi zbuloi edhe një ndryshim interesant mes gjinive. Burrat janë më të prirur të shohin një grua mësuese si partnere ideale (28%), ndërsa vetëm 19% e grave e konsiderojnë një burrë që punon në arsim si partner të dëshirueshëm.

Ndryshe nga stereotipi i përhapur në rrjetet sociale për partnerin ideal, shpesh i lidhur me pasurinë dhe profesionet në financë, vetëm 18% e grave preferojnë një partner që punon në këtë sektor. Ky profesion renditet më poshtë se sipërmarrësit dhe në të njëjtin nivel me artistët.

Studimi, i realizuar nga Talker Research për platformën e njohjeve The League, analizoi gjithashtu rolin e karrierës në marrëdhëniet romantike.

Sipas rezultateve:

-44% e të anketuarve preferojnë një partner me ambicie profesionale të ngjashme

-34% do të donin një partner edhe më ambicioz se vetja

Gjithashtu, 39% e pjesëmarrësve preferojnë një marrëdhënie ku të dy partnerët kontribuojnë financiarisht në mënyrë të barabartë.

Kjo prirje është më e theksuar tek gratë: 45% e tyre kërkojnë barazi në të ardhura, krahasuar me 33% të burrave.

Kur flitet për karrierën në një takim?

Sipas sondazhit, 22% e njerëzve do të donin të diskutonin për objektivat profesionale edhe para takimit të parë. Megjithatë, në praktikë shumica e përmendin profesionin rreth 54 minuta pas fillimit të takimit, ndërsa 18% e përmendin brenda 30 minutave të para.

Ekspertja e marrëdhënieve në The League, Rachel DeAlto, thekson se diskutimi i hershëm për karrierën mund të ndihmojë partnerët të kuptojnë më mirë vlerat dhe objektivat e përbashkëta.

Çfarë vlerësohet te një partner?

Për pjesëmarrësit në studim, karriera nuk lidhet vetëm me të ardhurat. Ata vlerësojnë tek një partner:

-pasionin për punën (40%)

-balancën mes jetës profesionale dhe personale (34%)

-dëshirën për të mësuar dhe për t’u përmirësuar (28%)

Nga ana tjetër, disa elemente konsiderohen negative në një marrëdhënie, si lodhja e vazhdueshme nga puna (32%), orët e shumta shtesë (29%) dhe ndryshimi i shpeshtë i vendit të punës (25%).

Po ashtu, 22% e të anketuarve e konsiderojnë profesionin e influencer-it si një “flamur të kuq” në një marrëdhënie.

Në përgjithësi, 56% e pjesëmarrësve theksuan se është shumë e rëndësishme që partnerët të ndajnë vlera dhe ambicie profesionale të ngjashme, pasi kjo ndihmon në krijimin e një marrëdhënieje më të qëndrueshme dhe mbështetëse.