Një vajzë 25-vjeçare ka shpjeguar se ajo nuk ka lindur me një gjendje që i ka penguar rritjen, por e ka zhvilluar atë në moshë të vogël. Për pothuajse gjithë jetën e saj, Shauna Rae ka qenë shumë më e shkurtër se miqtë dhe familjarët e saj dhe u diagnostikua me gjendjen e xhuxhit hipofizar në moshën 16-vjeçare.

“Unë jam 22 vjeç, por gjatësia ime është vetëm 1.17 metra dhe peshoj rreth 22 kg. Jetoj një jetë të burgosur në trupin e një fëmije tetëvjeçar,” u shpreh Shauna, e lindur në Pittsburgh, për një ekip të TLC TV në vitin 2022.

Ajo ka një reality show të quajtur “I Am Shauna Rae” ku tregon një pasqyrë në jetën e saj dhe mënyrën se si ajo përballon detyrat e përditshme, pavarësisht se duket si një nxënëse e shkollës fillore.

Shauna shpjegon në detaje arsyen dhe mënyrën se si iu zhvillua kjo gjendje, e cila ndikon tek fëmijët duke i bërë ata më të shkurtër se mesatarja, megjithëse përmasat e trupit mbeten “normale”.

“Kur isha gjashtë muajshe, mamaja ime vuri re një gungë në pjesën e pasme të kokës, kështu që më çoi te mjeku, dhe ai i tha se ishte një tumor – një tumor shumë agresiv dhe kanceroz,” kujton ajo. “Më futën menjëherë në operacion dhe pas operacionit kalova në kimioterapi për dy deri në tre vite. Isha rreth pesë vjeç dhe kur shkova në kopsht, vura re që të gjithë fëmijët e tjerë ishin dukshëm më të gjatë se unë.”

Fatkeqësisht, tumori që ishte zhvilluar në trurin e saj kishte dëmtuar hormonin e rritjes. Shauna vazhdon: “Ekzistonte të paktën një diferencë prej 30 centimetrash mes meje dhe fëmijëve të tjerë. Kur më çuan përsëri në spitalin pediatrik, zbuluan se gjëndra ime hipofizare ishte pothuajse e fjetur.”

“Kështu që të gjithë hormonet e mia, përfshirë hormonet e rritjes, gjëndrat e djersës, të gjitha këto prodhoheshin shumë më ngadalë. Fillova të marr hormone të rritjes, por fatkeqësisht, mjeku më tha se rritja ime kishte përfunduar. Kockat e mia ndaluan së rrituri në moshën 16-vjeçare. Nuk e kuptova plotësisht që nuk do të isha ‘normale’ derisa mbusha 16 vjeç.”

“Ai moment ishte thuajse si të shembeshin të gjitha ëndrrat e mia,” shprehet ajo.