Pijet me kakao mund të ndihmojnë në lehtësimin e stresit, duke neutralizuar njëkohësisht efektin negativ të ushqimeve me yndyrë që shumë prej nesh i konsumojnë kur jemi të stresuar.

Nëse hani ushqime të yndyrshme gjatë periudhave stresuese, pirja e kakaos mund t’ju ndihmojë të shëroheni më shpejt nga stresi.

Edhe pse kemi tendencë të drejtohemi drejt ushqimeve me shumë yndyrë gjatë kohës së stresit, konsumimi i kakaos mund të na ndihmojë të shërohemi më shpejt nga efektet fiziologjike të stresit. Këtë e tregon një studim i ri nga Universiteti i Birminghamit në Mbretërinë e Bashkuar.

Autorët e studimit, vërtetuan se konsumi i ushqimeve yndyrore mund të ndikojë negativisht në funksionin vaskular dhe të zvogëlojë oksigjenimin kortikal gjatë situatave stresuese, si dhe të parandalojë rimëkëmbjen e mëvonshme të organizmit.

Kakaoja përmban flavanolin, epikatekinën, e cila relakson shtresën e qelizave endoteliale të enëve të gjakut, përmirëson funksionin e tyre dhe rregullon presionin e lartë të gjakut, i cili është një reagim i zakonshëm ndaj stresit.

Konsumi i pijeve me kakao shoqërohet me një përgjigje më të mirë ndaj stresit.

Për këtë studim, shkencëtarët rekrutuan 23 individë të rinj e të shëndetshëm, burra dhe gra. Secilit iu dha një vakt me shumë yndyrë së bashku me një pije kakaoje me përmbajtje të lartë ose të ulët epikatekine, një orë e gjysmë përpara se t’i nënshtrohej një testi stresi tetëminutësh.

Funksioni i tyre vaskular u vlerësua duke matur zgjerimin e ndërmjetësuar nga rrjedha e gjakut të arteries brachiale, e cila tregon se sa mund të zgjerohet arteria kur rritet rrjedha e gjakut. Kjo u mat në fillim të provës dhe më pas 30 dhe 90 minuta pas detyrës stresuese.

Në grupin me përqendrim të lartë të epikatekinës, zgjerimi 30-minutësh i ndërmjetësuar nga rrjedha ishte më i ulët, por ishte përmirësuar ndjeshëm pas 90 minutash, duke treguar një shërim më të shpejtë nga efektet e stresit.

U matën edhe efekte të tjera të stresit, duke përfshirë oksigjenimin kortikal prefrontal, rrjedhjen e gjakut në parakrah, presionin e gjakut , aktivitetin kardiovaskular, diametrin e arteries karotide të përbashkët dhe rrjedhjen e gjakut, si dhe gjendjen shpirtërore. Në këto matje, nuk u vunë re dallime midis grupeve me epikatekinë të lartë dhe të ulët.