Kur filluan të vishen njerëzit për herë të parë? Zbulimi në Gjermani ofron të dhëna të ralla

Arkeologët në Gjermani kanë zbuluar disa nga provat më të hershme të përdorimit të veshjeve nga njerëzit e parë.

Sipas zbulimit, ata sugjerojnë se njerëzit janë mbuluar fillimisht me lëkurën e kafshëve që ata vrisnin gjatë gjuetisë. Pavarësisht këtyre të dhënave, shumë pak dihet në të vërtetë për mënyrën se si njerëzit e hershëm i mbijetuan dimrave të ashpër.

Leshi, lëkura dhe materialet e tjera organike zakonisht nuk ruhen më shumë se 100,000 vjet, që do të thotë se provat e drejtpërdrejta të veshjeve parahistorike janë të pakta.

Një ndër materialet më të përdorura dyshohet se ka qenë gëzofi i arinjve të shpellave, të cilët ishin kafshë të mëdha, që u zhdukën rreth 25,000 vjet më parë. Gëzofi i tyre ka qime të gjata që formojnë një shtresë mbrojtëse të ajrosur dhe qime të shkurtra e të dendura që ofrojnë izolim të mirë, pra ishin të përshtatshme për të bërë veshje, sipas studimit të botuar në Journal Of Human Evolution.