Çdo vit duket sikur arrijmë “kulmin” e përbërësve të kujdesit të lëkurës. Fillimisht ishte acidi hialuronik, një emër që tingëllonte si gjuhë e vjetër, ndërsa sot është ndër hidratuesit më të kërkuar. Më pas erdhën niacinamide, mukusi i kërmillit, retinoli dhe një listë e gjatë përbërësish që i kemi mësuar jo vetëm t’i njohim, por edhe t’i kombinojmë me radhë, shtresë pas shtrese, pa e prishur ekuilibrin e lëkurës. Në gjithë këtë zhurmë, disa përbërës kalojnë “nën radar”: janë në formulime, por rrallë bëhen ylli i produktit. Njëri prej tyre është beta glukani. Dhe sipas ekspertëve, ia vlen t’i kushtojmë vëmendje.

Çfarë është beta glukani?

Beta glukani është një polisakarid, pra një lloj karbohidrati, që merret nga burime si tërshëra, kërpudhat dhe disa maja të caktuara. Në kujdesin e lëkurës, ai përshkruhet si një qetësues “biologjik”: një molekulë që ndërvepron me receptorë në qelizat imune të lëkurës dhe ndihmon në modulimin e inflamacionit, duke mbështetur proceset e riparimit. Me një përkufizim më të thjeshtë, ekspertët e krahasojnë me një “ndërhyrës të parë” shumë të qetë dhe shumë kompetent, që shuan “zjarret” mikroskopike përpara se të shndërrohen në skuqje të dukshme apo irritim. Nëse i ndani përbërësit në “kategori” mendore, beta glukani qëndron pranë emrave si ectoin, ceramidet dhe allantoin: përbërës qetësues, miq të barrierës së lëkurës.

A ndihmon beta glukani për barrierën e lëkurës?

Po. Dermatologët theksojnë se beta glukani njihet për veti qetësuese dhe mbështetëse për barrierën. Ai mund të jetë veçanërisht i dobishëm për lëkurë që irritohet lehtë ose ka prirje për skuqje, përfshirë edhe situata ku lëkura reagon më shumë se zakonisht. Një arsye kryesore lidhet me faktin se beta glukani ka veti humektante. Humektantët janë molekula që tërheqin ujin drejt vetes, duke ndihmuar lëkurën të mbajë lagështinë dhe të reduktojë humbjen e ujit. Kur lëkura hidratohet më mirë, barriera priret të qetësohet dhe të hyjë më lehtë në procesin e rikuperimit.

A është beta glukani hidratues i mirë?

Sërish, po. Ekspertët e konsiderojnë të përshtatshëm për të gjitha tipet e lëkurës, por veçanërisht për lëkurën e thatë dhe të dehidratuar. Përveçse tërheq lagështinë, beta glukani mund të krijojë edhe një film të lehtë mbrojtës në sipërfaqe, që e ndihmon ujin të mos “ikë” sërish jashtë. Nga pikëpamja klinike, përshkruhet se lëkura mund të duket më e mbushur dhe më pak reaktive pas përdorimit, prandaj beta glukani shihet shpesh edhe në formula që synojnë komfortin e lëkurës së ndjeshme.

Për kë është më i përshtatshëm?

Edhe pse mund të përfitojnë të gjitha tipet e lëkurës, efektin më të menjëhershëm pritet ta vënë re ata që kanë lëkurë të thatë, të dehidratuar ose pak të zbehtë. Sipas ekspertëve, beta glukani është një zgjedhje shumë e mirë kur ka:

*ndjeshmëri të shtuar

*prirje për skuqje

*barrierë të kompromentuar

*irritim të shkaktuar nga përbërës aktivë, si retinoli ose vitamina C.