Lëpirja e njëra-tjetrës shpesh shihet si shenjë afërsie dhe kujdesi te macet. Por një studim i zhvilluar në Universitetin e Gentit në Belgjikë tregon se ky veprim mund të ketë edhe një tjetër kuptim: në disa raste, një mace mund ta përdorë lëpirjen për t’i bërë presion tjetrës dhe për ta larguar pa u përfshirë në një përleshje.

Studiuesit analizuan sjelljen e 106 maceve, të organizuara në 53 çifte që jetonin në familje me më shumë se një mace. Përmes videove të regjistruara nga pronarët, ata vëzhguan 23 tregues të ndryshëm të sjelljes, mes tyre pozicionin e veshëve, qëndrimin e trupit, lëvizjet dhe kontaktin fizik.

Studimi nisi pas një vëzhgimi të studiueses Morgane Van Belle. Ajo kishte parë se njëra prej maceve të saj, Giovanni, e lëpinte vazhdimisht tjetrën, Fabio, kur kjo e fundit zinte një vend të preferuar në diell. Pas pak, Fabio largohej dhe Giovanni zinte vendin.

Kjo sjellje i shtyu studiuesit të shqyrtonin nëse lëpirja mes maceve është gjithmonë një shenjë afërsie apo nëse mund të përdoret edhe për të shmangur një konflikt të drejtpërdrejtë.

Në rastet kur marrëdhënia është miqësore, macet zakonisht qëndrojnë pranë njëra-tjetrës, prekin trupin dhe duken të qeta. Pas lëpirjes mund të vazhdojnë të pushojnë, të flenë ose të luajnë së bashku.

Por situata ndryshon kur ka tension. Macja që lëpihet mund t’i tërheqë veshët pas, të lëpijë buzët, të tundë kokën ose të përpiqet të largohet. Në disa raste mund të reagojë edhe me putër ose kafshim.

Sipas studiuesve, në këto raste lëpirja mund të shërbejë si një formë presioni. Njëra mace e bezdis tjetrën derisa ajo të largohet, duke shmangur kështu një përplasje fizike.

Megjithatë, kjo sjellje nuk do të thotë domosdoshmërisht se macet janë agresive. Përkundrazi, studiuesit e shohin si një mënyrë të sofistikuar për të menaxhuar konfliktet pa kaluar menjëherë në dhunë.

Prandaj, për të kuptuar çfarë nënkupton lëpirja, nuk mjafton të shikohet vetëm ky veprim. Duhet parë edhe sjellja e përgjithshme e maceve, veçanërisht pozicioni i veshëve, qëndrimi i trupit dhe mënyra se si reagojnë pas kontaktit.