Një studim i ri sugjeron se lëpirja mes maceve nuk është gjithmonë një shenjë afërsie apo përkujdesjeje, por në disa raste mund të shërbejë edhe si një mënyrë për të shmangur konfliktet dhe për të ushtruar ndikim ndaj njëra-tjetrës.
Hulumtimi, i kryer nga studiues të Universitetit të Gentit, analizoi sjelljen e maceve që jetojnë në të njëjtën shtëpi dhe zbuloi se ky kontakt fizik mund të përdoret si një formë komunikimi për të zgjidhur mosmarrëveshjet pa kaluar në përplasje të drejtpërdrejta.
Ideja për studimin lindi nga një vëzhgim i studiueses Morgane Van Belle, e cila vuri re se njëra nga macet e saj e lëpinte vazhdimisht tjetrën derisa ajo largohej nga vendi ku ishte shtrirë. Më pas, macja tjetër zinte vendin e liruar, pa pasur nevojë për konflikt fizik.
Për të verifikuar këtë sjellje, studiuesit analizuan ndërveprimet e 53 çifteve macesh, gjithsej 106 kafshë, duke vëzhguar gjuhën e trupit, pozicionin e veshëve, kontaktin fizik dhe reagimet pas lëpirjes.
Rezultatet treguan se në shumë raste lëpirja shoqërohej me sjellje miqësore, si pushimi apo loja së bashku. Megjithatë, në raste të tjera u evidentuan shenja tensioni, ku njëra mace qëndronte mbi tjetrën, ndërsa kjo e fundit përpiqej të largohej ose shfaqte shenja bezdie.
Sipas studiuesve, kjo nuk do të thotë se macet janë agresive, por se ato përdorin mënyra të ndryshme për të menaxhuar marrëdhëniet dhe për të shmangur përplasjet e hapura.
Ekspertët theksojnë se për të kuptuar kuptimin e kësaj sjelljeje nuk mjafton vetëm lëpirja. Duhet të vëzhgohet i gjithë komunikimi i trupit, përfshirë qëndrimin e maceve, pozicionin e veshëve, reagimin e maces tjetër dhe sjelljen që pason kontaktin.