Nëse dikur për të treguar se ishe në një lidhje mjaftonte një foto me partnerin, tani duket se nuk është më e nevojshme. Mjaftojnë dy gota vere, dy pjata dhe një karrige që duket sikur sapo është lënë bosh.
Fenomeni është i thjeshtë, dikush shkon për darkë, porosit dy gota verë dhe fotografon tavolinën në mënyrë të tillë që personi i dytë të mos duket askund. Dhe pikërisht këtu nis loja. A ka vërtet dikush përballë? Është partneri? Një mik? Apo personi ka porositur dy gota vetëm për efektin e fotos?
Publiku mbetet të hamendësojë. Trendi ka lidhje me të ashtuquajturin “soft launch”, praktikën e publikimit të shenjave të vogla për të treguar se dikush i ri ka hyrë në jetën sentimentale, pa zbuluar identitetin e tij. Një dorë, një shpatull, një siluetë apo dy gota janë të mjaftueshme për të ndezur kureshtjen. Por “çifti imagjinar” shkon edhe më tej: partneri mund të ekzistojë… ose jo.
Ad
Në fakt, një fotografi me dy gota nuk është provë për asgjë. Mund të jetë një takim romantik, një darkë me shokun më të mirë, një tryezë e përgatitur për dikë që vonohet ose thjesht një skenar i menduar mirë për Instagram.
Dhe kjo është pjesa më argëtuese. Në rrjetet sociale nuk mjafton më të tregosh çfarë po bën. Tani mund të lësh vetëm një “provë” dhe t’ua lësh ndjekësve pjesën tjetër. Një gotë tregon se po pi verë. Dy gota hapin një hetim. Kush është personi tjetër? Pse nuk duket? A është lidhje e re? Apo thjesht një gotë shtesë? Në fund, ndoshta partneri më i qëndrueshëm i kësaj historie është… imagjinata e ndjekësve.