Një studim i ri shkencor sugjeron se pirja e disa filxhanëve kafeje ose çaji me kafeinë çdo ditë mund të ndihmojë në ruajtjen e funksionit të trurit dhe të ulet rreziku i zhvillimit të demencës, megjithëse efekti është i vogël.
Sipas studimit, i publikuar në revistën JAMA, personat që konsumonin sasinë më të lartë të kafeinës kishin 18% rrezik më të ulët për demencë krahasuar me ata që konsumonin më pak. Përveç kësaj, pjesëmarrësit me konsum më të lartë shfaqën pak më pak probleme me kujtesën dhe funksionet mendore, sipas vetëvlerësimit të tyre.
Efektet e ngjashme u vunë re edhe tek ata që konsumonin çaj me kafeinë, por jo tek pijet pa kafeinë. Studiuesit theksuan se rezultatet janë inspiruese, por studimi nuk provon shkak-pasojë dhe efekti i kafesë ose çajit është relativisht i vogël.
Rezultatet ishin më të dukshme tek ata që konsumonin:
2–3 filxhanë kafe me kafeinë në ditë
1–2 filxhanë çaji me kafeinë në ditë
Sipas autorëve, përbërës bioaktivë si kafeina dhe polifenolët në kafesë dhe çaj mund të reduktojnë inflamacionin e qelizave nervore dhe të mbrojnë trurin nga dëmtimet, duke ndihmuar në ruajtjen e shëndetit njohës gjatë plakjes.
“Përveç kafesë dhe çajit, faktorë të tjerë të stilit të jetesës, si ushtrimet fizike, dieta e shëndetshme dhe gjumi i mjaftueshëm, janë të rëndësishëm për parandalimin e demencës,” tha Dr. Daniel Wang nga Harvard Medical School, autor kryesor i studimit.
Studiuesit pohojnë se përfitimet e kafesë dhe çajit janë të ngjashme pavarësisht predispozicionit gjenetik për demencë, duke treguar se këto pije mund të jenë të dobishme për të gjithë.