Një studim i ri i prezantuar në kongresin vjetor të European Society of Human Genetics në Göteborg ka hedhur dritë mbi arsyet pse disa familje arrijnë të jetojnë më gjatë dhe me më pak probleme shëndetësore, shkruan corriere.it.
Studimi i u bazua në të dhënat e Leiden Longevity Study, një projekt që studion familje ku disa anëtarë kanë arritur moshë shumë të avancuar.
Shkencëtarët kishin vënë re më parë se fëmijët e prindërve jetëgjatë zhvillojnë sëmundje kardiovaskulare dhe metabolike më vonë sesa njerëzit me histori familjare më pak të favorshme.
Duke analizuar ADN-në e 212 grupeve familjare me vëllezër dhe motra jetëgjatë, studiuesit identifikuan 12 variante të rralla gjenetike që mund të ndikojnë në procesin e plakjes.
Vëmendje të veçantë tërhoqi një variant në gjenin CGAS, i cili luan rol të rëndësishëm në sistemin imunitar dhe në kontrollin e inflamacionit.
Sipas studiuesve, ky variant mund të ndihmojë organizmin të mbajë nën kontroll inflamacionin kronik të lehtë që shoqëron plakjen, një fenomen i njohur si “inflammaging”.
Ky inflamacion i vazhdueshëm lidhet me sëmundjet e zemrës, dobësimin e organizmit dhe rënien e funksioneve fizike e mendore me kalimin e viteve.
Megjithatë, ekspertët theksojnë se nuk bëhet fjalë për një “gjen të pavdekësisë”.
Jetëgjatësia nuk varet nga një gjen i vetëm, por nga ndërveprimi kompleks i faktorëve gjenetikë, stilit të jetesës, mjedisit dhe fatit biologjik.
Studimi sugjeron vetëm se disa variante gjenetike mund të ndihmojnë trupin të ruajë një ekuilibër më të mirë mes mbrojtjes imunitare dhe inflamacioneve.