Festat zakonisht lidhen me kohë qetësie dhe relaksi. Megjithatë, për shumë njerëz, këto ditë sjellin stres, lodhje emocionale dhe ndjenja faji për shkak të pritshmërive të jashtme dhe të brendshme. Kur gjithçka rreth nesh duket e gëzueshme, ndjenja e tensionit brenda mund të bëhet edhe më e dukshme.
Kur pushimi nuk sjell qetësi?
Shqetësimi gjatë festave nuk është rastësor. Ndërprerja e rutinës së përditshme krijon hapësira ku lodhja e akumuluar dhe pakënaqësia e pashprehur dalin në sipërfaqe.
Nga njëra anë dëshirojmë të ngadalësojmë ritmin, të relaksohemi dhe të jemi prezent, por pritshmëritë për takime, vizita dhe përgjegjësi emocionale krijojnë konflikt mes asaj që duam dhe asaj që ndjejmë se duhet të bëjmë, duke kthyer pushimin në burim tensioni.
Nervozizmi si shenjë e mbingarkesës së brendshme…
Shumë herë nervozizmi nuk lidhet me të tjerët, por me presionin që vendosim mbi veten për të qenë të mjaftueshëm dhe të disponueshëm për të gjithë. Dëshira për të mos zhgënjyer të tjerët, vështirësia për të thënë “jo” dhe ndjenja se pushimi duhet merituar shtojnë lodhjen emocionale.
Kjo përjetohet nga trupi si tension në kraharor, ngurtësi në qafë, irritim i shpejtë dhe shqetësim i paarsyeshëm, sepse sistemi nervor mbetet në gjendje vigjilence.
Shumë njerëz përpiqen ta rregullojnë këtë me aktivitete të vazhdueshme, si gatimi, pastrimi apo përdorimi i telefonit, ushqimit ose alkoolit. Këto strategji qetësojnë përkohësisht shqetësimin, por nuk adresojnë shkakun.