Qyteti Ann Arbor, në Michigan, një vend i vogël me 100 mijë banorë, është kryeqyteti amerikan i makinave. Këtu shoferët e makinave nuk janë më inteligjentë se në vende të tjera të botë, por makinat po.

Nëpër rrugët e këtij qyteti të vogël qarkullojnë rreth 3000 makina të cilat ‘dialogojnë’ vazhdimisht me njëra-tjetrën dhe sinjalistikën rrugore, duke bërë të mundur në këtë mënyrë shmangien e aksidenteve.


Eksperimenti futuristik është duke u ndjekur dhe monitoruar nga departamenti i transporteve në Universitetin e Michigan dhe ka si objektiv zerimin e numrit të aksidenteve dhe përmirësimin e drejtimit të trafikut.

Projekti i drejtuar nga Peter Sweatman, i quajtur ‘Safety Pilot Model Dployment project’, ka një objektiv tepër ambicioz, nisur kjo nga të dhënat në rritje të numrit të aksidenteve rrugore.


Mënyra se si funksionojnë makinat në Ann Harbor lidhet me kombinimin e teknologjisë tashmë të njohur të navigimit GPS dhe transmetimit të të dhënave për lëvizjen e tyre. Çdo mjet transporti i përfshirë në projekt (edhe kamionë apo autobusë), është i pajisur me një sistem komunikimi nëpërmjet të cilit ai mund të komunikojë me mjetet e tjera, parametrat e tij të lëvizjes të tilla si vendndodhja, shpejtësia, drejtimi etj.


Nëse sistemi has në diçka anormale lidhur me këta parametra, i tillë si një ngadalësim i shpejtësisë së makinës pararendëse çka mund të çojë praktikisht në një përplasje, lajmëron menjëherë drejtuesin e mjetit përmes një sinjali akustik apo përmes ndezjes së të gjitha dritave të kroskotit të makinës.


Përveçse në një bashkërendim perfekt me njëra- tjetrën, makinat qëndrojnë në një lidhje konstante edhe me sinjalistikën rrugore; 29 kryqëzime të qytetit janë informatizuar me një bazë të dhënash në mënyrë që të jenë të aftë të ‘dialogojnë’ me makinat. Semaforët, për shembull, janë në gjendje të analizojnë rrjedhën e trafikut në mënyrë që ta bëjnë më fluidë dhe të rrjedhshëm atë duke shmangur bllokimin.


Pjesëmarrësit në këtë eksperiment aveniristik janë të gjithë vullnetarë që kanë kërkuar të bëhen pjesë e projektit dhe që kanë pranuar të montojnë në makinë të gjitha instrumentet e nevojshme: një GSP, dy antena për transmetimin e të dhënave, një kuti të zezë që regjistron të gjitha parametrat e udhëtimit të makinës dhe një kompjuter që i lidh të gjitha. Shumica e pjesëmarrësve janë prindër (nëna ose babai) i fëmijëve që shkojnë në shkollë dhe që hasen më tepër në fluksin e trafikut në të njëjtën kohë.


Hapi i ardhshëm parashikon ndërhyrje për ta bërë akoma më të sofistikuar sistemin, në mënyrë që të perceptojë paraprakisht rreziqet potenciale, për shembull, instalimin e sensorëve në frena që të mund të zbulojnë frenimin e papritur dhe të komunikojnë rrezikun e goditjes për të gjitha automjetet në vijim.

16 tetor 2012 (gazeta-Shqip.com)