Një studim i madh dhe gjithëpërfshirës i bërë nga spanjollët përfshiu 41 mijë të rritur për më shumë se 11 vjet. Studiuesit në përfundim, nuk vunë re asnjë lidhje mes konsumit të ushqimeve të skuqura dhe sëmundjeve të zemrës, madje as mes ushqimeve të skuqura dhe vdekshmërisë në përgjithësi. Sipas studimeve të reja, shumë e rëndësishme është temperatura, kohëzgjatja e skuqjes dhe zgjedhja e vajit.


Të gjithë e dimë se sa shumë shijojnë ushqimet e skuqura, ashtu siç e dimë se ky lloj gatimi është një ndër më të rrezikshmit për shëndetin tonë, e sidomos për shëndetin kardiovaskular. Gjithsesi lajme të mira për të gjithë ata që adhurojnë ushqimet e gatuara në këtë mënyrë vijnë nga një studim i ri, i publikuar kohët e fundit në “British Medical Journal”, ku u vlerësua lidhja mes konsumit të ushqimeve të skuqura dhe rrezikut të prekjes nga sëmundjet e zemrës. Një studim i madh dhe gjithëpërfshirës i bërë nga spanjollët përfshiu 41 mijë të rritur për më shumë se 11 vjet. Studiuesit në përfundim të studimit, nuk vunë re asnjë lidhje mes konsumit të ushqimeve të skuqura (përfshi këtu ata të skuqur në tigan me pak vaj dhe ata me shumë vaj) dhe sëmundjeve të zemrës, madje as mes ushqimeve të skuqura dhe vdekshmërisë në përgjithësi. Një risi kjo nëse do ta lidhnim me studimet e tjera, në një prej të cilave ishte vërejtur se konsumi i shpeshtë i ushqimeve të skuqura ishte i lidhur me një rrezik më të lartë të infarktit të miokardit akut.


Vaji i ullirit


Diferenca e rezultateve të studimit EPIC mund të shpjegohet me faktin se në Spanjë për të skuqur përdoret vaji i ullirit dhe se konsumi i ushqimeve të skuqura nuk është i lidhur me fast-food-et. Për më tepër, patatet e skuqura me shumë kripë, janë më pak të përdorura se në vendet e tjera. Me pak fjalë jo të gjitha llojet e skuqjes së ushqimit janë të njëjta. “Për sa u përket të skuqurave duhet kujtuar se skuqja e tyre dhe gatimet e tjera në temperatura të larta, i ruajnë më mirë vetitë ushqyese të ushqimeve, nga ana tjetër procesi i skuqjes ka disa pika të dobëta që mund të ridimensionohen falë disa veprimeve. Para së gjithash duhet përdorur vetëm vaj ulliri, sidomos për ushqimet që duan vaj të bollshëm për t’u skuqur”, thotë Giovanni Lercker, profesor i shkencave dhe teknologjisë ushqimore në Universitetin e Bolonjës. A ka rreziqe të tjera të mëdha që i kanosen organizmit nga ushqimet e skuqura? Le të marrim si shembull patatet, për të cilat jo vetëm të vegjlit, por edhe të rriturit lënë kokën. Shumë vaj i nxehur mirë dhe disa kohë përpara të lënë në ujë të ftohtë. Pastaj gati për t’u shijuar.


Studimet e mëparshme


Gratë që konsumojnë sasi të mëdha patatinash apo ushqime të skuqura shtojnë ndjeshëm riskun për t’u prekur nga kanceri në mitër apo në vezore. Të paktën kështu referohet në një studim holandez, në të cilin janë analizuar rastet e 120 000 vullnetarëve, 62 000 prej të cilave ishin femra. Studimi ka zgjatur për gati 11 vjet. Në fillim të studimit vullnetarëve u është kërkuar të plotësonin një pyetësor që lidhej me “sjelljet ushqimore” të tyre, nga ku doli se 327 gra ishin prekur nga tumori endometrial dhe 300 nga tumori në ovare. Studiuesit e Universitetit të Mastrihtit kanë fajësuar “acrilamide”, një substancë që prodhohet te patatinat apo ushqimet e skuqura që kanë bazë amidesh, të cilat vitin e kaluar janë konsideruar si kancerogjene. Sipas studiuesve holandezë, gratë që konsumonin 40 mg acrilamide çdo ditë (pak a shumë një gjysmë pako biskotash, një porcion patatesh të skuqura) kishin më tepër risk të shfaqnin kancer, madje dy herë më tepër, sesa gratë që konsumonin ushqime me bazë të paktë të këtij ushqimi. Gjithsesi ky studim është i pari i këtij lloji që flet për një lidhje mes acrilamideve dhe tumoreve: “Praktikisht është e pamundur të eliminohen acrilamidet nga dieta e çdo dite dhe janë të nevojshme studime të tjera përpara se të konfirmohet, që të shtohet risku për tumoret”, kanë shpjeguar në revistën shkencore “Cancer Epidemiology, Biomarkers and Prevention”.