José Mourinho dyshohet se ka futur një metodë të pazakontë në përgatitjen e Real Madridit: analiza të detajuara të arbitrave, me synimin e pretenduar për të ndikuar në mënyrën si gjykojnë ndeshjet.
Akuzën e ka ngritur gazetari katalanas Gerard Romero në emisionin e tij në Jijantes FC, duke iu referuar bisedave me kolegë që mbulojnë klubin madrilen. Sipas tij, Mourinho dhe stafi i tij u kanë shfaqur lojtarëve video rreth 30-minutëshe, ku analizohen stili, personaliteti dhe mënyra e menaxhimit të ndeshjeve nga gjyqtarët.
Pretendimi më i rëndë lidhet me përdorimin e këtyre analizave për të ushtruar presion mbi arbitrat. Sipas Romero-s, lojtarëve u shpjegohet se si të reagojnë në varësi të profilit të secilit gjyqtar, si pjesë e një strategjie më të gjerë psikologjike.
Gazetari pretendon gjithashtu se stafi po përpiqet të krijojë te skuadra bindjen se Real Madridi po përballet me një mjedis armiqësor. “Ata po përpiqen ta bëjnë grupin të besojë se të gjithë janë kundër tyre, në mënyrë që t’u japë forcë për të vazhduar”, është shprehur Romero.
Këto akuza vijnë në një periudhë tensionesh rreth arbitrimit në futbollin spanjoll dhe pas përplasjeve të Mourinhos me gjyqtarët. Megjithatë, bëhet fjalë për pretendime të raportuara nga gazetari katalanas, të cilat nuk janë konfirmuar në mënyrë të pavarur.