Edhe pse FSHF u dënua me mbylljen e stadiumit me 20%, pas ndeshjes Shqipëri- Andorra, duket se për përballjen me Serbinë më 7 qershor, “Arena Kombëtarë” do të jetë i mbushur plot.
Mësohet se FSHF-ja ka zhvilluar negociata intensive me qeverinë botërore të futbollit për mënyrën e zbatimit të vendimit dhe lehtësimin e masave të stadiumit.
Kështu, FIFA i ka dhënë dritën jeshile FSHF-së për të vendosur përsëri tifozë në tribunat pas porte për ndeshjen e madhe Shqipëri-Serbi më 7 qershor. Kjo pas përgatitjes së një plani të përmirësuar kundër diskriminimit dhe angazhimit të FSHF-së për të parandaluar çdo sjellje të papranueshme.
Sipas marrëveshjes, tribunat që ishin parashikuar për mbyllje 20% do të mbushen me një përzierje të grupeve të komunitetit dhe organizatave kundër diskriminimit, si dhe tifozëve tradicionalë shqiptarë, duke siguruar një ambient ku mbështetja për Kombëtaren shoqërohet me mesazhe të forta kundër diskriminimit.
FSHF-ja u ka bërë apel tifozëve që të tregojnë përgjegjësi dhe respekt në sjelljen e tyre gjatë ndeshjes ndaj Serbisë, për të shmangur ndëshkime të mëtejshme dhe për të ndihmuar në krijimin e një atmosfere pozitive dhe të sigurt në stadium.
Ndeshja Shqipëri-Serbi më 7 qershor pritet të jetë një test i rëndësishëm jo vetëm për futbollistët, por edhe për tifozët dhe Federatën, në drejtim të promovimit të sportivitetit dhe bashkëjetesës përballë sfidave sociale. Me marrjen e këtij vendimi, mbrëmjen e së shtunës tjetër, do të kemi një stadium të mbushur plot.
FIFA i vendosi Federatës Shqiptare të Futbollit gjobë dhe masë disiplinore për sjelljen diskriminuese të disa tifozëve shqiptarë në ndeshjen kualifikuese për Botërorin 2026 ndaj Andorrës në “Arena Kombëtare”.
