Sulmuesi i Zvicrës, Breel Embolo, nuk ka mundur të udhëtojë me pjesën tjetër të ekipit drejt Shteteve të Bashkuara të Amerikës për shkak të problemeve të papritura me autorizimin e tij të hyrjes në vend.
Kombëtarja zvicerane u nis të martën drejt SHBA-së për të vazhduar përgatitjet për Kupën e Botës, por futbollisti 29-vjeçar mbeti në aeroport pasi autoritetet amerikane vendosën të rishikojnë aplikimin e tij ESTA, dokumenti elektronik që lejon hyrjen në territorin amerikan.
Sipas mediave zvicerane, çështja lidhet me një vendim gjyqësor që daton nga një incident i vitit 2018. Në vitin 2023, Embolo u shpall fajtor për kërcënime të përsëritura dhe u dënua me një gjobë me kusht. Vendimi u konfirmua më pas edhe në apel, ndërsa futbollisti vendosi të mos e çonte çështjen në Gjykatën Federale, duke e bërë vendimin përfundimtar.
Federata Zvicerane e Futbollit konfirmoi se autorizimi i Embolos ishte i vlefshëm deri në mëngjesin e së martës, por më pas u vendos nën shqyrtim të mëtejshëm nga autoritetet amerikane.
Megjithatë, drejtuesit e futbollit zviceran mbeten optimistë se sulmuesi do t’i bashkohet skuadrës shumë shpejt. Në një deklaratë zyrtare, federata bëri të ditur se është në kontakt të vazhdueshëm me autoritetet përkatëse dhe pret që lojtari të udhëtojë brenda ditës ose të bashkohet me ekipin të nesërmen.
Kjo nuk është hera e parë që Embolo udhëton drejt SHBA-së, pasi ai ishte pjesë e kombëtares zvicerane edhe në ndeshjet miqësore të zhvilluara vitin e kaluar kundër SHBA-së dhe Meksikës.
Sulmuesi i Rennes ka qenë pjesë e Zvicrës në pesë turnetë e fundit madhorë ndërkombëtarë, përfshirë Kupat e Botës 2018 dhe 2022. Ai vjen gjithashtu në formë të mirë, pasi realizoi një gol në fitoren 4-1 të Zvicrës ndaj Jordanisë në ndeshjen miqësore të zhvilluar të dielën.