Një relike e rrallë nga vitet e para të Lionel Messit pritet të tërheqë interes të madh në tregun e koleksionistëve sportivë. Bëhet fjalë për fanellën që ai mbante në vitin 1993, kur ishte vetëm pesë vjeç dhe aktivizohej me ekipin e fëmijëve të klubit Grandoli në Rosario të Argjentinës.
Kjo fanellë me shirita të kuq dhe të bardhë ka mbijetuar falë trajnerit të atëhershëm të ekipit, Pablo Alfieri. Pas përfundimit të turneut ku luajti Messi i vogël, Alfieri i ruajti fanellat, të cilat më pas kaluan brenda familjes së tij, duke u trashëguar nga djali te nipi. Kjo vijimësi pronësie ka ndihmuar në ruajtjen e autenticitetit dhe vlerës historike të objektit.
Objekti u bë publik për herë të parë përmes sezonit të tretë të dokumentarit të Netflix “King of Collectibles: The Goldin Touch”, i cili ndjek aktivitetin e ankandistit të njohur amerikan Ken Goldin. Edhe pse ende nuk janë bërë publike detaje mbi ankandin apo çmimin fillestar, ekspertët mendojnë se fanella mund të arrijë një vlerë shumë të lartë në shitje.
Interesi i madh për sendet e lidhura me Messin është dëshmuar edhe më parë. Në fund të vitit 2023, disa fanella të përdorura prej tij gjatë Kupës së Botës në Katar u shitën për afro 8 milionë dollarë. Ndërkohë, fanella e veshur kur shënoi golin e tij të 500-të në El Clasico kundër Real Madridit arriti një çmim prej 450 mijë dollarësh në ankand.
Krahasuar me këto objekte, fanella e vitit 1993 konsiderohet edhe më e veçantë, pasi përfaqëson një nga dëshmitë më të hershme të fillimit të karrierës së njërit prej futbollistëve më të mëdhenj të historisë.