Rocco Commisso, presidenti i Fiorentinas, është ndarë nga jeta në moshën 76-vjeçare, pas një beteje të gjatë me probleme shëndetësore. Lajmi u bë i ditur nga vetë klubi në orët e para të së shtunës, përmes një komunikate zyrtare.

Në njoftimin e publikuar, Fiorentina e përshkruan ndarjen e tij nga jeta si një humbje të rëndë jo vetëm për familjen Commisso, por edhe për klubin, tifozët dhe gjithë botën e futbollit.

“Presidenti ynë na ka lënë pas një periudhe të gjatë trajtimi mjekësor. Sot jemi të gjithë të bashkuar në dhimbje për këtë ndarje të madhe,” thuhet mes të tjerash në deklaratë.

Klubi vë në pah anën njerëzore të Commisso-s, duke e cilësuar atë si një figurë shembullore familjare: një bashkëshort i përkushtuar dhe një baba i dashur. Ai ishte i martuar prej gjysmë shekulli me bashkëshorten e tij, Catherine, me të cilën ndante një lidhje të fortë të ndërtuar mbi respekt dhe përkushtim të ndërsjellë.

Biznesmeni amerikano-italian mori drejtimin e Fiorentinës shtatë vite më parë dhe që nga ai moment u bë një figurë qendrore në jetën e klubit dhe të qytetit të Firences. Gjatë presidencës së tij, skuadra viola arriti të luante dy finale të UEFA Conference League, si edhe një finale të Kupës së Italisë, duke rikthyer ambiciet dhe krenarinë e klubit në skenën europiane.

Për Commisso-n, futbolli nuk ishte thjesht biznes. Fiorentina u shndërrua në pasionin e tij më të madh dhe ai ndërtoi një raport të drejtpërdrejtë me tifozët, duke preferuar gjithmonë që të thirrej thjesht “Rocco”. Ishte i njohur për praninë e tij konstante pranë ekipit dhe akademisë, ku kalonte shpesh kohë me të rinjtë, duke i inkurajuar dhe mbështetur personalisht.

“Dashuria për Fiorentinën ishte dhurata më e bukur që ai i bëri vetes,” thekson klubi, duke kujtuar momentet e shumta të thjeshta, por domethënëse, që Commisso ndau me lojtarët dhe stafin.

Një rol i veçantë i tij u evidentua edhe gjatë pandemisë COVID-19, kur përmes nismës “Forza e Cuore” u mblodhën fonde të rëndësishme për spitalet e Firences, duke ndihmuar konkretisht komunitetin në një nga periudhat më të vështira.

Trashëgimia e tij do të mbetet e gjallë edhe fizikisht: qendra moderne stërvitore e klubit, “Rocco B. Commisso Viola Park”, do të mbajë përgjithmonë emrin e tij, si simbol i vizionit, pasionit dhe investimit të tij për të ardhmen e Fiorentinës dhe zhvillimin e brezave të rinj.