Gjashtë gola në shtatë ndeshjet e fundit. Statistika që flet vetë për Arman Durmishin, sulmuesi 17-vjeçar shqiptar që po shkruan histori me Juventusin Primavera.
I lindur më 25 qershor 2008 në Slloveni, Durmishi u shpall kapokanoniere i kampionatit U17 sloven me 28 gola në sezonin 2023/24 me Koperin. Forma e tij e jashtëzakonishme bëri që Juventusi ta siguronte në shtator 2024. Në sezonin e parë me bardhezinjtë U17 shënoi 14 gola, duke konfirmuar cilësinë e tij.
Por shpërthimi i vërtetë erdhi këtë sezon te Primavera (U20). Titullar fiks në sulm, Durmishi po dominon: dopietë kundër Atalantës më 30 dhjetor, gola vendimtarë në UEFA Youth League kundër Bodo/Glimt, dhe performanca që kanë sjellë 10 nga 14 pikët e fundit të Juventusit. Shifrat tregojnë një shënues natyral me instinkt për gol dhe pjekuri përtej moshës. 2 golat e fundit erdhën në ndeshjen e djeshme që Juventusi fitoi 3-1 përballë Veronës.
Pas përvojës me kombëtaret e reja sllovene, në mars 2025 Durmishi zgjodhi Shqipërinë. Ka luajtur tre ndeshje me U19, dhe megjithëse ende pa gola me përfaqësuesen, forma e tij te Juventusi premton shumë për të ardhmen.
Me gjashtë gola në shtatë ndeshje dhe një rritje konstante nga Koperi te Torino, Durmishi po tregon se është më shumë se një talent – është një investim për të ardhmen. Për Shqipërinë, ai përfaqëson një gjeneratë të re që po rritet në akademitë më prestigjoze të Evropës. Ylli shqiptar po shndrit mbi Torino, dhe kjo është vetëm fillimi i historisë së tij.