Roma ka dhuruar një paraqitje spektakolare në javën e 12-të të Serie A, duke mposhtur Parmën me rezultatin e thellë 5-1 në transfertë. Trajneri Gian Piero Gasperini u shfaq mjaft i kënaqur me suksesin e skuadrës, që e ngjiti përkohësisht në vendin e dytë të renditjes.

Njeriu i ndeshjes ishte padyshim Donyell Malen, i cili realizoi plot katër gola, ndërsa Rodrigo Mora plotësoi festivalin e golave për verdhekuqtë.

Pas ndeshjes, Gasperini vlerësoi paraqitjen e futbollistëve, por theksoi se sfida nuk ishte aspak e lehtë, pavarësisht rezultatit të thellë. Tekniku italian pranoi se rikthimi nga pushimi i kombëtareve kishte sjellë pasiguri, pasi disa lojtarë ishin bashkuar me skuadrën vetëm në momentet e fundit.

“Jam shumë i lumtur. Gjithmonë ka njëfarë pasigurie pas pushimit të kampionatit, veçanërisht kur shumë lojtarë largohen me kombëtaret dhe disa kthehen vetëm në momentin e fundit. Rezultati nuk tregon vështirësinë e ndeshjes. Malen ishte i jashtëzakonshëm!”, u shpreh Gasperini.

Me këtë paraqitje, Malen konfirmohet si një nga pikat më të forta të Romës këtë sezon, duke marrë gjithë vëmendjen pas katër golave të shënuar në “Ennio Tardini”.