Paris Saint-Germain merr lajme të këqija pas fitores 4-2 ndaj Barcelonës në Champions League. Khvicha Kvaratskhelia ka pësuar këputje të ligamentit të kryqëzuar anterior në gjurin e djathtë dhe do t’i nënshtrohet një ndërhyrjeje kirurgjikale në ditët në vijim.
Sulmuesi gjeorgjian u detyrua të largohej nga fusha pas rreth një ore lojë në përballjen e së martës, ndërsa ekzaminimet mjekësore konfirmuan dëmtimin e rëndë.
Problemet nuk përfundojnë këtu për skuadrën e Luis Enriques. Ousmane Dembélé ka pësuar një dëmtim në kofshën e majtë, ndërsa kapiteni Marquinhos ka dëmtuar kofshën e djathtë. Sipas njoftimit të klubit, të dy lojtarët do të vijojnë trajtimin mjekësor për disa javët e ardhshme.
Kështu, pas suksesit të rëndësishëm ndaj Barcelonës, PSG-ja përballet me një situatë të vështirë sa i përket gjendjes fizike të disa prej lojtarëve kryesorë të saj.