Bota e wrestling-ut është zhytur në zi pas ndarjes nga jeta të një prej figurave më legjendare të saj: Hulk Hogan. Ikona e ringut ndërroi jetë në moshën 71-vjeçare në banesën e tij në Clearwater, Florida, si pasojë e një arresti kardiak. Lajmi tronditës u konfirmua nga TMZ Sports, ndërsa ndihma mjekësore mbërriti menjëherë në vendngjarje, por pa mundur të bëjë asgjë për të shpëtuar jetën e tij.
I lindur më 11 gusht 1953 në Augusta të Georgias, me emrin e vërtetë Terry Eugene Bollea, Hulk Hogan do të mbetet në histori si emri më i madh i wrestling-ut të viteve ’80 dhe një ikonë pop-kulturore që kaloi përtej kufijve të sportit. Me trupin e tij të fuqishëm, shaminë karakteristike dhe mustaqet bionde, ai mishëroi figurën e heroit amerikan të pamposhtur dhe gjithmonë të gatshëm për të triumfuar. Thirrja e tij e famshme “Whatcha gonna do, brother?” jehonte në çdo cep të botës ku transmetohej wrestling-u.
Gjatë karrierës së tij të lavdishme, Hogan fitoi 12 tituj kampion bote dhe u bë fytyra që çoi WWF, tani WWE, drejt një suksesi global. Ai ndau ringun me emra të pavdekshëm si André the Giant, Randy Savage, Ultimate Warrior dhe The Undertaker, duke kthyer wrestling-un në një spektakël familjar që ngjalli emocione brez pas brezi. Në vitin 2005, ai u nderua me përfshirjen në WWE Hall of Fame, një vlerësim i merituar për gjithçka që i dha sportit dhe fansave.
Përtej ringut, Hulk Hogan u bë një personazh i gjithanshëm: aktor në filma e seriale, fytyrë televizive, dhe sipërmarrës. Ai nuk e humbi kurrë lidhjen me publikun, siç dëshmoi edhe paraqitja e tij e bujshme në nëntor 2024 gjatë Konventës Kombëtare Republikane, ku u ngjit në skenë para fjalimit të Donald Trump dhe tërhoqi vëmendjen ndërkombëtare me gjestin simbolik të grisjes së bluzës.
Hulk Hogan nuk ishte vetëm një sportist, ai ishte një simbol, një kapitull i gjallë i historisë së wrestling-ut. Me ndarjen e tij nga jeta, mbyllet një epokë, por trashëgimia e tij do të jetojë përgjithmonë në zemrat e miliona fansave anembanë globit.