Domenico Rocca është në qendër të vëmendjes. Në orët e fundit, emri i ish-gjyqtarit anësor është bërë shumë i popullarizuar në lidhje me hetimin ndaj shefit të arbitrave italianë, Gianluca Rocchit për bashkëpunim në mashtrime sportive. Hetimi nga Prokuroria e Milanos thuhet se ka rrjedhur nga ankesa që Rocca, rreth një vit më parë, i dërgoi Komisionit Kombëtar të Arbitrimit për të raportuar parregullsi serioze në menaxhimin e Rocchit.
Një letër e detajuar me shumë akuza dhe episode e dërguar pasi, në fund të sezonit të kaluar, emri i Roccas u shfaq midis listës së 14 asistentëve të shkarkuar pa ndonjë shpjegim specifik nga zyrtarët e arbitrimit.
Pasi prokuroria italiane njoftii zyrtarisht hetimin, Rocca ka reaguar publikisht me një postim: “Kush me shpatë plagos, nga shpata do të vdesë”, ishte komenti i postuar në rrjetet sociale, një goditje e fortë pasi Rocchi u vendos në listën e të dyshuarve.
Rocca u aktivizua për 14 ndeshje sezonin e kaluar: një në Serie A, 13 në Serie B. Kjo është një pikë për të cilën ish-ndihmësi kalabrez këmbënguli në letrën e tij të gjatë, duke akuzuar komisionin se ka ndryshuar vlerësimet, emërimet dhe renditjet, duke kompromentuar drejtësinë dhe meritokracinë.
Kush është Domenico Rocca? I lindur në Kalabri në vitin 1985, Domenico Rocca, nga seksioni AIA i Catanzaros, e filloi karrierën e tij si gjyqtar në moshën 15 vjeç. Pasi përparoi nëpër kategoritë rajonale dhe ndërrajonale, ai ishte anëtar i CAN D dhe më pas i CAN Pro, përpara se të niste një karrierë si ndihmës gjyqtar, gjë që e çoi të luante si në Serie A ashtu edhe në Serie B. Më 12 shkurt 2017, ai bëri debutimin e tij në ligën më të lartë si gjyqtar anësor në një ndeshje Torino-Pescara. Karriera e tij përfundoi sezonin e kaluar kur, së bashku me 13 kolegë të tjerë, u shkarkua pa asnjë shpjegim të mëtejshëm.
Top Channel