Finalja e Kupës së Botës 2026 mes Argjentinës dhe Spanjës do të luhet në një stadium që për Lionel Messin ka një domethënie të veçantë. Pikërisht në MetLife Stadium në New Jersey, aty ku dhjetë vite më parë shpalli largimin nga kombëtarja argjentinase, legjenda e futbollit rikthehet për të luajtur finalen e tretë të Botërorit në karrierë.

Më 26 qershor 2016, pas humbjes ndaj Kilit në finalen e Copa America Centenario dhe penalltisë së humbur, Messi deklaroi se rrugëtimi i tij me Argjentinën kishte përfunduar.

“Vendimi është marrë. Bëra gjithçka për të fituar diçka, por nuk ia dola. Eksperienca ime me kombëtaren mbaroi”, u shpreh ai asokohe.

Megjithatë, vendimi nuk zgjati shumë. Messi u rikthye me fanellën bardhekaltër dhe, nën drejtimin e trajnerit Lionel Scaloni, udhëhoqi një nga periudhat më të suksesshme në historinë e futbollit argjentinas.

Që nga viti 2021, Argjentina ka fituar Copa America 2021, Finalissima 2022, Kupën e Botës 2022 dhe Copa America 2024, ndërsa tani synon të shtojë edhe një tjetër trofe botëror.

Në këtë rrugëtim vendimtar ka qenë edhe puna e Lionel Scalonit, i cili ndërtoi një skuadër të ekuilibruar rreth Messit dhe krijoi një grup të bashkuar me lojtarë si Rodrigo De Paul, Emiliano Martinez, Cristian Romero, Julián Álvarez, Lautaro Martínez dhe të tjerë.

Përballë tyre do të jetë një Spanjë që konsiderohet favorite pas paraqitjeve mbresëlënëse në këtë Botëror. Iberikët kanë kombinuar përvojën me talentin e brezit të ri, ku spikat Lamine Yamal, ndërsa në mesfushë udhëhiqen nga Rodri.

Finalja pritet të jetë edhe një duel simbolik mes dy brezave të futbollit. Nga njëra anë është Lionel Messi, që mund të luajë ndeshjen e fundit në një Kupë Bote, ndërsa nga ana tjetër qëndron Lamine Yamal, talenti që shumë e shohin si një nga yjet e së ardhmes.

Një tjetër detaj që e bën këtë përballje edhe më të veçantë është fotografia ikonike e vitit 2007, ku një Messi 20-vjeçar shfaqej duke mbajtur në krahë një Lamine Yamal vetëm disa muajsh gjatë një sesioni fotografik për UNICEF. Sonte, për herë të parë, ata do të përballen si rivalë në fushë, në finalen më të madhe të futbollit botëror.