Formula 1
Britaniku triumfoi në Suzuka, duke barazuar idhullin e tij, Airton Sena, me 41 fitore në karrierë
Luis Hemilton bëri një tjetër hap të rëndësishëm drejt titullit të tij të tretë kampion në Formula 1, duke fituar Çmimin e Madh të Japonisë në një garë ku triumfi i tij u vu në diskutim vetëm në kthesat e para, në një duel me shokun e skuadrës, Niko Rosberg. Në pistën e Suzukas, Mercedes la pas krahëve të gjitha problemet e një jave më parë në Singapor, duke mbyllur garën me pilotët e vet në të dyja vendet e para për të tetën herë në këtë sezon.
Ky ishte suksesi i 41 në karrierë për Hemilton, i cili barazoi idhullin e tij Airton Sena, në garën e 162 në Formula 1. Triumfi ka çuar në 48 pikë diferencën e britanikut ndaj shokut të tij të skuadrës, Niko Rosberg, i cili e ndjek në klasifikim dhe me pesë gara të mbetura duket se titulli kampion është kthyer në një formalitet për të.
Momenti vendimtar i garës së djeshme ishte në sekondat e para të saj, kur Rosberg dhe Hemilton dueluan me njëri-tjetrin në kthesat e para. Hemilton arriti t’i zinte trajektoren pilotit gjerman që nisej nga “pole position” dhe me një manovër agresive e detyroi të dilte pak jashtë piste, duke i mundësuar Fetel dhe Botas që ta kalonin. Hemilton pastaj zhvilloi një garë thuajse në heshtje të plotë, derisa preu vijën e finishit për të marrë këtë sukses shumë të rëndësishëm për fatin e këtij kampionati. Ndërsa Rosberg mendoi vetëm si të rikuperonte gabimin dhe fillimisht kaloi Botas në pistë e më pas shfrytëzoi ndalesën e dytë në bokse për të kaluar edhe Fetel, që të siguronte vendin e dytë në këtë garë.
Fetel, ndonëse provoi në xhirot e fundit që të arrinte Rosberg, u desh të kënaqej me pozicionin më të ulët në podium. Pas tij, falë një paraqitjeje pozitive, u rendit Kimi Raikonen me Ferrarin tjetër, ndërsa Botas përfundoi në vendin e pestë, edhe pse ishte nisur i treti. Dy protagonistë të kësaj gare pritej të ishin Felipe Masa dhe Daniel Riçiardo, por një përplasje mes tyre që në metrat e parë i detyroi të ktheheshin në bokse për të ndërruar pjesë të makinës. Kësisoj, braziliani përfundoi në vendin e 17, ndërsa australiani që mori vendin e dytë në Singapor, e mbylli garën i 15-i.
Një garë shumë pozitive ishte ajo e Niko Hulkenberg me Force India, i cili u nis nga vendi i 13, por me një start të shpejtë dhe falë gabimeve të pretendentëve, siguroi vendin e gjashtë. Pas tij u renditën Romen Groszhan dhe Pastor Maldonado, të cilët në pistë bënë të harroheshin problemet financiare të skuadrës Lotus. Ndërkohë, zonën e pikëve e plotësuan dy makinat Toro Roso të Maks Verstapen dhe Karlos Sainz.
Zhgënjyese vazhdon të jetë paraqitja e MekLaren, e cila dështoi edhe në pistën e “shtëpisë” për konstruktorin Honda, që e furnizon me motorë. Këtë radhë as Fernando Alonso nuk e fshehu dëshpërimin e tij me një shpërthim publik. “Kjo është turpëruese, shumë turpëruese”, ishte mesazhi i tij në radio, duke vijuar me “ky është motor për garat e GP2”, një sinjal i qartë se spanjolli, i cili mbylli garën në vendin e 11, pret sa më shpejt një ndryshim të situatës.
Botërori për pilotë
- Hemilton 277 p.
- Rosberg 229
- Fetel 218
- Raikonen 119
- Botas 111
- Masa 97
- Riçiardo 73
- Kviat 66
- Groszhan 44
- Perez 39
- Hulkenberg 38
- Verstapen 32
- Nasr 17
- Maldonado 16
- Sainz 12
- Alonso 11
- Erikson 9
Xh. Baton 6