Lionel Messi ka bërë një gjest solidariteti ndaj banorëve të prekur nga zjarret shkatërrimtare në Spanjë, duke dhuruar 80 mijë euro për rindërtimin e rajonit të Sierra Oeste, një nga zonat më të dëmtuara nga flakët gjatë ditëve të fundit.
Lajmi është konfirmuar nga presidentja e Komunitetit të Madridit, Isabel Díaz Ayuso, e cila falënderoi publikisht yllin argjentinas për kontributin e tij financiar.
“E falënderojmë Lionel Messin për dhurimin e tij. Madrilenët e presin së shpejti për t’i shprehur personalisht mirënjohjen dhe vlerësimin që meriton”, u shpreh Ayuso.
Fondi i dhuruar nga Messi do të përdoret për mbështetjen e procesit të rindërtimit në Sierra Oeste, ku zjarret kanë shkaktuar dëme të konsiderueshme në pyje, banesa dhe infrastrukturë, duke detyruar gjithashtu evakuimin e qindra banorëve.
Ky nuk është rasti i parë kur kampioni i botës angazhohet në nisma humanitare. Gjatë karrierës së tij, Messi ka kontribuar vazhdimisht në projekte bamirësie dhe në mbështetje të komuniteteve të prekura nga fatkeqësi natyrore apo situata të vështira sociale, përmes fondacionit të tij dhe donacioneve personale.
Gesti i fundit i futbollistit argjentinas është vlerësuar gjerësisht në Spanjë, duke u konsideruar si një ndihmë konkrete për familjet dhe komunitetet që po përballen me pasojat e një prej zjarreve më të rënda që kanë goditur rajonin në javët e fundit.