Lionel Messi po shkon drejt kapitullit përmbyllës të historisë së tij me kombëtaren argjentinase. Sulmuesi 39-vjeçar pritet të veshë për herë të fundit fanellën e “Albiceleste”-s më 6 tetor, në miqësoren kundër Beninit.
Për të shënuar këtë moment të veçantë, Adidas ka përgatitur një fanellë të dedikuar për yllin argjentinas. Uniforma është prezantuar përmes një videoje në rrjetet sociale, ndërsa në qendër të dizajnit qëndron numri që ka shoqëruar Messin gjatë pjesës më të madhe të karrierës së tij ndërkombëtare.
Numri 10 shfaqet me ngjyrë të artë në pjesën e pasme të fanellës dhe është ndërthurur me simbolikën e flamurit të Argjentinës. Elementi grafik lidhet me diellin karakteristik të flamurit, i cili shfaqet i integruar në materialin e uniformës.
Fanella është konceptuar si një homazh për rrugëtimin e jashtëzakonshëm të Messit me kombëtaren, me të cilën ka regjistruar 207 paraqitje dhe 125 gola. Kulmi i aventurës së tij me Argjentinën erdhi në vitin 2022, kur udhëhoqi ekipin drejt triumfit në Kupën e Botës.
Përpara takimit të 6 tetorit, kampionët e botës kanë në program edhe dy ndeshje të tjera. Argjentina do të luajë kundër Bolivisë më 30 shtator dhe Burkina Fasos më 3 tetor, takime në të cilat Messi nuk pritet të jetë i pranishëm.
Miqësorja me Beninin pritet kështu të kthehet në një mbrëmje të veçantë për futbollin argjentinas, me Messin që do të mbyllë një epokë të gjatë me fanellën bardhekaltër.