“Përgëzime Spanjës”/ Messi thyen heshtjen pas humbjes në finalen e Botërorit: Dhimbja është shumë e madhe, por...

Lionel Messi ka reaguar për herë të parë pas humbjes së Argjentinës në finalen e Kupës së Botës 2026 ndaj Spanjës. Kapiteni argjentinas, pavarësisht një turneu ku vazhdoi të tregojë klasin dhe ndikimin e tij në futbollin botëror edhe në moshën 39-vjeçare, nuk arriti të ndryshonte fatin e finales, ku Spanja u shfaq më e fortë dhe fitoi trofeun.

Ylli argjentinas zgjodhi rrjetet sociale për të ndarë emocionet e tij me tifozët. Messi pranoi se humbja e një finaleje botërore është një dhimbje e madhe, por theksoi se rrugëtimi i skuadrës dhe përpjekjet e gjithë grupit mbeten një arritje e rëndësishme.

“Dhimbja është shumë e madhe dhe do të jetë e vështirë që kjo plagë të mbyllet. Por gjithashtu mbetem me gjithçka të mirë që kemi bërë. Me ndeshjet që përmbysëm duke dhënë gjithçka dhe që do të mbeten përgjithmonë në kujtesë”, shkroi Messi.

Kapiteni i Argjentinës vlerësoi përpjekjen e ekipit dhe mbështetjen e tifozëve, duke kujtuar se kjo ishte finalja e dytë radhazi e Kupës së Botës për kombëtaren argjentinase.

“Sot është e vështirë të vlerësojmë atë që kemi bërë, por ky grup arriti në dy finale radhazi të Kupës së Botës. Faleminderit nga zemra për çdo përshëndetje dhe çdo mesazh. Edhe një herë arritëm të bashkojmë një vend të tërë dhe të ndajmë krenarinë e madhe për të qenë argjentinas”, u shpreh Messi.

Për sulmuesin e Inter Miami, kjo ishte finalja e dytë e humbur në një Kupë Bote. Ai e çoi ndeshjen deri në kohën shtesë dhe u përpoq të ndihmonte skuadrën në ndërtimin e aksioneve, por këtë herë nuk arriti të kishte ndikimin vendimtar që kishte treguar në sfidat e mëparshme të turneut. Messi ishte një nga protagonistët kryesorë të rrugëtimit të Argjentinës drejt finales, duke ndihmuar ekipin në momente vendimtare, por përballë Spanjës nuk arriti të gjente hapësirat dhe mundësitë për të bërë diferencën. Në fund të mesazhit të tij, kapiteni argjentinas zgjodhi të urojë edhe kundërshtarin për suksesin historik.

“Dua gjithashtu të përgëzoj Spanjën për kampionatin”, shkroi Messi.

Humbja në finale i mohoi Argjentinës një tjetër triumf botëror, ndërsa Spanja feston titullin e kampiones së botës pas një finaleje ku konfirmoi forcën e saj në skenën më të madhe të futbollit.