Një vendim i marrë më shumë se dy dekada më parë mund të kishte ndryshuar jo vetëm karrierën e Lionel Messit, por edhe gjithë historinë e futbollit botëror.

Në vitin 2004, kur ishte vetëm 17 vjeç, Messi u gjend përballë një zgjedhjeje që mund ta kishte çuar në një rrugëtim krejt tjetër ndërkombëtar. Ashtu si në filmin “Sliding Doors”, ku një moment i vogël ndryshon të gjithë rrjedhën e jetës, edhe një vendim i Messit mund të kishte krijuar një realitet tjetër për futbollin.

Në atë periudhë, Spanja kishte nisur procedurat për ta bërë pjesë të kombëtares së saj të moshave të reja. Talenti nga Rosario kishte impresionuar aq shumë, sa autoritetet spanjolle po përgatiteshin ta përfshinin në Botërorin U-20.

Në Argjentinë, megjithatë, alarmi ishte ngritur. Trajneri i të rinjve, José Pekerman, e konsideronte Messin si lojtarin që do të udhëhiqte të ardhmen e kombëtares.

“Ai ishte fytyra e re e futbollit tonë. Duhej të shmangnim me çdo kusht humbjen e tij”, ka deklaruar Pekerman më vonë.

Për të mos lejuar që Messi të debutonte me Spanjën, Argjentina organizoi një plan urgjent. Trajnerët vendosën që ai të grumbullohej për një ndeshje miqësore me kombëtaren U-20, në mënyrë që të regjistrohej zyrtarisht si lojtar i Argjentinës.

Sipas rrëfimeve të Pekermanit, gjithçka u bë me shpejtësi, pasi Spanja ishte shumë pranë për ta marrë talentin e ri në radhët e saj.

Me ndihmën e presidentit të atëhershëm të Federatës Argjentinase të Futbollit, Julio Grondona, plani funksionoi. Messi veshi fanellën bardhekaltër dhe nisi një histori që do të ndryshonte përgjithmonë futbollin.

Sot, pyetja “çfarë do të kishte ndodhur nëse Messi do të kishte zgjedhur Spanjën?” mbetet një nga dilemat më të mëdha të historisë së sportit.

Spanja mund të kishte pasur në dispozicion një nga futbollistët më të mëdhenj të të gjitha kohërave, ndërsa Messi mund të kishte ndërtuar një tjetër trashëgimi ndërkombëtare.

Madje, një skenar i tillë do të kishte krijuar një dyshe të jashtëzakonshme me Lamine Yamal, talentin spanjoll që sot konsiderohet një nga yjet më të mëdhenj të brezit të ri.

Por historia zgjodhi një rrugë tjetër. Pa kontributin e Messit në Botërorin 2022, ku ai udhëhoqi Argjentinën drejt titullit në Katar, është e vështirë të imagjinohet suksesi i fundit i “Albicelestes”.

Në fund, një miqësore e vetme në vitin 2004 ndryshoi fatin e një lojtari, të një kombëtareje dhe ndoshta të gjithë futbollit botëror.