Pak orë para përballjes mes Kosovës dhe Austrisë në stadiumin “Fadil Vokrri”, vëmendja është përqendruar edhe te gjendja e fushës së lojës. Përzgjedhësi i Austrisë, Ralf Rangnick, e ka kritikuar ashpër terrenin në Prishtinë, duke e cilësuar atë në një gjendje jashtëzakonisht të dobët.
“Fusha është në një gjendje katastrofike. Në 41 vite, rrallë kam përjetuar një fushë kaq keq të mirëmbajtur”, është shprehur Rangnick, duke ngritur shqetësime për kushtet në të cilat do të zhvillohet ndeshja.
Sipas trajnerit gjerman, problemi nuk prek vetëm Austrinë. Ai ka theksuar se një terren i tillë ndikon te të dyja skuadrat, përfshirë edhe Kosovën, e cila sipas tij është një ekip me lojtarë teknikisht të aftë dhe që mund të ndikohet nga cilësia e fushës.
Kritikat e Rangnick vijnë në prag të sfidës së Ligës së Kombeve, ku Kosova dhe Austria përballen të dielën në “Fadil Vokrri”.
Megjithatë, të dyja skuadrat vijnë në Prishtinë pas rezultateve të ndryshme në ndeshjet e fundit. Kosova barazoi 0-0 me Izraelin më 1 tetor, ndërsa Austria barazoi 2-2 në transfertë ndaj Irlandës. Në përballjen e parë mes tyre në këtë edicion, Austria fitoi 3-1 në Vjenë.
Austria, për më tepër, e nisi këtë seri të ndeshjeve me fitore 3-1 ndaj Izraelit dhe më pas mori një pikë në Dublin. Rangnick ka thënë pas ndeshjes me Irlandën se synimi i skuadrës së tij në Prishtinë është të paktën të shmangë humbjen.
Në anën tjetër, Kosova e kishte nisur grupin me një fitore 1-0 ndaj Irlandës, përpara barazimit pa gola me Izraelin. Përballja e së dielës do të jetë ndeshja e kthimit me Austrinë, pas triumfit 3-1 të austriakëve në Vjenë.
Top Channel