Rodrigo Hernández, i njohur si Rodri, ka zbuluar detaje të reja rreth interesimit të Real Madridit për të, përpara se të vendoste të transferohej te Barcelona.
Mesfushori spanjoll, i cili këtë verë u largua nga Manchester City për t’iu bashkuar klubit katalanas, ka bërë të qartë se vendimi për të mos kaluar te Real Madridi nuk erdhi për shkak të mungesës së interesimit nga madrilenët.
Përkundrazi, Rodri ka treguar se drejtuesit e Real Madridit bënë përpjekje serioze për ta bindur atë.
“Duhet të them se Madridi tregoi interes që nga fillimi, se ata u sollën në një mënyrë shembullore dhe se ofertat e tyre ishin për lojtarin. Dua ta bëj të qartë edhe këtë”, deklaroi Rodri në programin radiofonik “El Partidazo de COPE”.
I pyetur nëse Real Madridi kishte bërë gjithçka për ta transferuar, Rodri pranoi se klubi madrilen kishte shfaqur interes maksimal, edhe pse nuk dëshiroi të përcaktonte konkretisht se çfarë do të nënkuptonte “100 për qind”.
“Nuk e di çfarë do të thotë të japësh 100 për qind, por është e qartë se ata ishin të interesuar dhe dhanë gjithçka që kishin, duke treguar interesin e tyre. E vlerësoj këtë, sepse fola me disa prej tyre dhe kaq”, u shpreh ai.
Rodri nuk zbuloi nëse kishte pasur kontakt të drejtpërdrejtë me presidentin e Real Madridit, Florentino Pérez, por konfirmoi se kishte komunikuar me persona brenda klubit.
Sipas mesfushorit, ata i kishin përcjellë dëshirën dhe entuziazmin për ta parë atë në “Santiago Bernabéu”.
“Fola me njerëz atje, të cilët përcollën entuziazmin dhe dëshirën e tyre që unë të shkoja atje. Kjo gjithashtu e bëri vendimin tim më të komplikuar, kjo është e qartë”, deklaroi Rodri.
Megjithatë, në fund ai zgjodhi Barcelonën. Rodri ka shpjeguar edhe më herët se vendimi i tij ishte i lidhur kryesisht me aspektin sportiv dhe projektin që i ofroi klubi katalanas.
Kështu, pavarësisht interesimit të fortë nga Real Madridi, mesfushori spanjoll vendosi të vazhdojë karrierën e tij në “Camp Nou”, duke u bërë pjesë e projektit të drejtuar nga Hansi Flick.