Planet për zgjerimin e Kupës së Botës së meshkujve në 64 skuadra do të shqyrtohen pas përfundimit të Botërorit 2026. Këtë e konfirmoi presidenti i FIFA-s, Gianni Infantino, i cili theksoi se turneu duhet të jetë një kompeticion që përfaqëson të gjithë botën.
Ideja për një Botëror me 64 ekipe u hodh për herë të parë vitin e kaluar. Sipas Infantinos, suksesi i formatit të ri me 48 skuadra është një arsye e fortë që FIFA të analizojë seriozisht mundësinë e një zgjerimi të mëtejshëm.
“Këto janë çështje që do t’i shqyrtojmë pas Kupës së Botës. Kur organizon një Botëror, duhet ta mendosh atë për të gjithë botën, jo vetëm për Evropën dhe Amerikën e Jugut. Çdo komb duhet të ketë mundësinë të ëndërrojë pjesëmarrjen në Kupën e Botës”, deklaroi Infantino për transmetuesin zviceran Blue Sport.
Ai shtoi se niveli i futbollit është rritur ndjeshëm në të gjitha kontinentet dhe se zgjerimi i turneut do t’u jepte mundësi edhe vendeve më të vogla të konkurronin në skenën më të madhe të futbollit.
“Sot shohim se cilësia e skuadrave është shumë e lartë dhe vazhdon të përmirësohet në të gjithë botën. Nëse nuk u jepet vendeve më të vogla mundësia për të marrë pjesë në Kupën e Botës, ato do ta kenë më të vështirë të zhvillohen dhe të përmirësohen”, u shpreh kreu i FIFA-s.
Infantino e cilësoi gjithashtu Botërorin e parë me 48 skuadra si një “sukses të madh”, duke përmendur si shembull paraqitjen e ekipeve afrikane.
“Në këtë Botëror, nëntë nga dhjetë skuadrat afrikane arritën të kualifikohen në fazën me eliminim direkt. Në Botërorin e kaluar kishte vetëm pesë përfaqësuese nga Afrika. Kjo tregon qartë sa e rëndësishme është t’u japim mundësi të gjitha vendeve të marrin pjesë”, përfundoi Infantino.