Presidenti i Komitetit Olimpik Polak, Radoslaw Piesiewicz, është arrestuar nga autoritetet në kuadër të një hetimi për korrupsion dhe përfitime të dyshuara të paligjshme të lidhura me sektorin e kriptomonedhave.
Sipas prokurorëve, Piesiewicz dyshohet se ka marrë ryshfet nga drejtues të kompanisë së kriptomonedhave Zondacrypto, në këmbim të marrëveshjeve sponsorizuese me Komitetin Olimpik Polak.
Hetimi ndaj tij nisi në prill dhe ka shkaktuar prej muajsh përplasje në sportin polak. Shumica e federatave sportive të vendit kishin kërkuar largimin e tij nga drejtimi i Komitetit Olimpik.
Arrestimi është konfirmuar edhe nga ministri polak i Sportit, Jakub Rudnicki, i cili e ka akuzuar Piesiewicz për dëmtim të rëndë të imazhit të lëvizjes olimpike në vend.
Në qendër të hetimit është një marrëveshje sponsorizimi mes Komitetit Olimpik dhe Zondacrypto, e cila parashikonte edhe shpërblime në kriptomonedha për sportistët polakë që do të fitonin medalje në Lojërat Olimpike Dimërore Milano-Cortina.
Hetimet janë zgjeruar edhe mbi aktivitetin e Zondacrypto-s, e cila ka ndërprerë aktivitetin. Autoritetet vlerësojnë se kolapsi i kompanisë ka shkaktuar humbje prej rreth 350 milionë zloty, ose afërsisht 80 milionë euro, duke prekur rreth 30 mijë persona.
Prokurorët po hetojnë gjithashtu një orë me vlerë rreth 40 mijë euro, që Piesiewicz raportohet se e ka marrë nga Przemyslaw Kral, një prej drejtuesve të kompanisë. Presidenti i Komitetit Olimpik e ka mohuar se ora ishte dhuratë dhe ka deklaruar se e kishte blerë me paratë e tij.
Kral, ndërkohë, raportohet se po bashkëpunon me prokurorët në këmbim të një trajtimi më të favorshëm në procesin gjyqësor.
Hetimi po shqyrton edhe lidhje të mundshme të kompanisë me figura politike dhe struktura mediatike të krahut nacionalist në Poloni.
Autoritetet theksojnë se çështja është ende në fazën e hetimit dhe se arrestimi i Piesiewicz nuk përbën provë përfundimtare të fajësisë së tij.