Kjo fundjavë në elitën e futbollit italian ka folur qartësisht shqip, por shkëlqimi i yjeve tanë në Apenine vjen me një hije të madhe kontrasti kur kthejmë sytë nga Kombëtarja e Kosovës.
Paraqitjet e jashtëzakonshme nuk kanë kaluar pa u vënë re nga platforma e specializuar “SofaScore”, e cila ka përfshirë plot dy futbollistë shqiptarë në formacionin më të mirë të javës së 5-të të Serie A. Në majën e sulmit qëndron Edon Zhegrova, protagonist absolut me Juventusin. Pavarësisht humbjes 3-2 përballë Sassuolos, sulmuesi shënoi një dopietë spektakolare, duke u shpërblyer me një vlerësim të jashtëzakonshëm prej 9.2. Nga ana tjetër, ekuilibrin në prapavijë e garanton “kulla” e Napolit, Amir Rrahmani, i cili me një notë 7.7 vulosi një tjetër paraqitje prej lideri. Në një 11-she ku vetë italianët numërohen me gishtat e njërës dorë (vetëm tre të tillë), ky është një dominim absolut i lojtarëve tanë.
Por, këtu nis edhe një paradoks i vërtetë, nga ato që vetëm futbolli ynë di t’i prodhojë. Pikërisht në momentin e tyre më të mirë, as Zhegrova dhe as Rrahmani nuk do të jenë pjesë e grumbullimit të Kosovës për sfidat jetike të Ligës së Kombeve.
Nëse në Itali janë mbretër, në Prishtinë ata janë kthyer në epiqendrën e një stuhie. Kapiteni Rrahmani ka trazuar ujërat me një deklaratë të fortë, duke dalë hapur dhe në mënyrë të drejtpërdrejtë kundër Federatës, një lëvizje që ka lënë prapavijën e “Dardanëve” pa liderin e saj natyral. Nga ana tjetër, shkëlqimi dhe dopieta me Juventusin nuk i kanë mjaftuar Edon Zhegrovës për të marrë ftesën; tekniku Franco Foda ka zgjedhur të përdorë dorën e hekurt, duke e lënë jashtë sulmuesin për arsye të pastra disiplinore.
Të kesh dy ndër lojtarët më të mirë të kampionatit italian dhe të mos i kesh në fushë për Kombëtaren është një luks që ndoshta Kosova nuk e ka, por që fatkeqësisht tregon se jashtë fushës së blertë, sfidat mbeten po aq të vështira sa ato brenda saj.
Top Channel