Policia e Elbasanit ka publikuar planin e masave në kuadër të ndeshjes Skënderbeu-Dinamo Zagreb, e vlefshme për turin paraeliminator të Europa League që do të luhet nesër në orën 20:00 në Elbasan Arena.
350 efektivë policie do të angazhohen për mbarëvajtjen e ndeshjes, disa akse rrugore të qytetit të Elbasanit do të bllokohen dhe të gjitha lokalet rreth stadiumit do të jenë të mbyllura nga ora 17:00 deri në përfundim të ndeshjes.
Në njoftimin e shpërndarë për mediat policia u bën thirrje tifozëve të jenë të pajisur me biletë dhe kartë identiteti dhe të mos marrin me vete sende të paligjshme si fishekzjarre, monedha apo çelësa.
“Nga ora 16:00 e datës 24 gusht nuk do te lejohet parkimi i mjeteve:
Në rrugën “11 Nëntori” nga “Kryqëzimi i Romëve” deri në dalje në unazë.
Nga rruga “Kozma Naska” deri tek ish – konservimi, nuk do të lejohet parkimi i mjeteve pasi do të përdoret për raste emergjente.
Nuk do të lejohet parkimi i automjeteve përreth dhe përballë stadiumit
Nuk do të lejohet qarkullimi i mjeteve nga “Kryqëzimi i Romëve” deri tek rruga “Kozma Naska”
Nuk do të lejohet Qarkullimi i mjeteve nga rruga “Kamber Sejdini”, “Kryqëzimi i Romëve” deri tek kryqëzimi me rrugën “Kozma Naska”
Lidhur me ndeshjen do të angazhohen 350 punonjës policie nga Drejtoria Vendore e Policisë Elbasan, Komisaraitet vartëse të saj dhe nga FNSH-ja e Tiranës.
Të gjithë sportëdashesit që do të marrin pjesë në këtë aktivitet, të jenë të pajisur me biletë dhe me kartë identiteti dhe të mos kenë me vete:
- a) sende të forta,
- b) shishe (të çfarëdolloji)
- c) fishekzjarre
- d) monedha apo metale (të çfarëdolloji)
- e) çelësa të ndryshëm
Në të kundert NUK do të lejohen të futen në stadium.
Në hyrje të stadiumit do të kontrollohen të gjithë sportdashësit”, sqaron policia.
23 gusht 2017 (gazeta-Shqip.com)