Arbitri holandez Rob Dieperink ka ndërruar jetë në moshën 38-vjeçare, vetëm pak javë pasi u përjashtua nga lista e arbitrave të Kupës së Botës pas arrestimit të tij në Britaninë e Madhe në lidhje me dyshime për një sulm seksual.
Lajmi është konfirmuar nga Federata Holandeze e Futbollit (KNVB), e cila u shpreh se është “e tronditur dhe thellësisht e pikëlluar” për ndarjen nga jeta të arbitrit me eksperiencë ndërkombëtare. Deri më tani, shkaku i vdekjes nuk është bërë publik.
Dieperink ishte arrestuar në muajin prill nga Policia Metropolitane e Londrës, pasi një adoleshent kishte denoncuar një sulm seksual të dyshuar në një adresë në Croydon. Megjithatë, pas hetimeve, autoritetet britanike njoftuan se provat nuk ishin të mjaftueshme për ngritjen e akuzave dhe çështja u mbyll pa pasoja ligjore.
Pavarësisht mbylljes së hetimeve, FIFA vendosi ta largonte nga lista e arbitrave të planifikuar për Kupën e Botës, një vendim që vetë Dieperink e kishte cilësuar zhgënjyes.
Pas përfundimit të hetimeve, arbitri deklaroi se ishte akuzuar padrejtësisht dhe se kishte bashkëpunuar plotësisht me policinë, FIFA-n, UEFA-n dhe Federatën Holandeze të Futbollit.
Sipas raportimeve, incidenti i dyshuar kishte ndodhur në prag të një ndeshjeje të UEFA Conference League në Londër, ku Dieperink ndodhej për angazhime zyrtare dhe ishte arrestuar në prani të zyrtarëve të tjerë të UEFA-s.
Në mesazhin e saj të ngushëllimit, Federata Holandeze e Futbollit e përshkroi Dieperink si një arbitër të respektuar dhe një profesionist të përkushtuar, duke shprehur mbështetje për familjen dhe të afërmit e tij.
Rob Dieperink nisi karrierën si arbitër profesionist në vitin 2012, ndërsa prej vitit 2017 drejtonte ndeshje në Eredivisie. Ai kishte shërbyer edhe si arbitër VAR në Kampionatin Evropian 2024 në Gjermani, ndërsa ndeshjen e fundit e arbitroi vetëm pak ditë para vdekjes, në miqësoren mes Go Ahead Eagles dhe Apollon FC.