UEFA ka vendosur të ndëshkojë Federatën e Futbollit të Kosovës (FFK) pas incidenteve të regjistruara gjatë përballjes së Nations League kundër Izraelit, ku mes të tjerash u dëgjuan edhe fërshëllima gjatë interpretimit të himnit kombëtar izraelit.
Organi drejtues i futbollit europian ka vendosur një gjobë totale prej 42 250 eurosh ndaj FFK-së, si dhe një masë disiplinore që parashikon mbylljen e pjesshme të stadiumit “Fadil Vokrri”.
Megjithatë, ndëshkimi që lidhet me kufizimin e pranisë së tifozëve është lënë pezull për një periudhë dyvjeçare. Kjo do të thotë se masa mund të hyjë në fuqi në rast se gjatë kësaj kohe përsëriten shkelje të ngjashme.
Sipas vendimit disiplinor, Federata e Futbollit të Kosovës është gjobitur me 10 mijë euro për sjellje raciste dhe/ose diskriminuese të tifozëve. Për këtë shkelje është parashikuar edhe mbyllja e pjesshme e stadiumit në ndeshjen e ardhshme që Kosova do të zhvillojë në një kompeticion të UEFA-s, por ekzekutimi i masës është pezulluar për dy vite.
Një tjetër gjobë prej 10 mijë eurosh është vendosur për incidentet e ndodhura gjatë ekzekutimit të himneve kombëtare.
Ndërkohë, hedhja e sendeve në fushën e lojës i ka kushtuar FFK-së 2 250 euro të tjera.
Sanksioni më i lartë financiar, në vlerën e 20 mijë eurove, lidhet me shfaqjen e një mesazhi që UEFA e ka konsideruar të papërshtatshëm për një aktivitet sportiv.
Në total, katër shkeljet e evidentuara nga organet disiplinore të UEFA-s e çojnë faturën financiare për Federatën e Futbollit të Kosovës në 42 250 euro.
Vendimi përbën një paralajmërim për FFK-në lidhur me organizimin e ndeshjeve ndërkombëtare dhe sjelljen e tifozëve në stadium, pasi përsëritja e incidenteve gjatë periudhës së përcaktuar mund të sjellë aktivizimin e masës së pezulluar për mbylljen e pjesshme të tribunave.
