Lamine Yamal ka qenë sërish në qendër të vëmendjes gjatë paradës së Barcelonës për fitimin e titullit në La Liga.
Ylli 18-vjeçar katalanas, ndër protagonistët kryesorë të sezonit blaugrana, shfrytëzoi çastin e festës për të shprehur një mesazh të qartë politik. Gjatë paradës me autobus të hapur, Yamal mori flamurin palestinez nga tifozët dhe e valëviti dukshëm nga autobusi. Gjesti i tij u përhap menjëherë nëpër rrjetet sociale dhe u bë njëri nga imazhet më të komentuara të ditës.
Por kjo nuk ishte e vetmja gjë që tërhoqi vëmendjen. Yamal u shfaq edhe me bluzën me mbishkrimin “Falënderoj Zotin që nuk jam Madridista”, duke nxitur kënaqësinë e tifozëve katalanas dhe tallje të mëtejshme ndaj rivalëve të përjetshëm të Realit, të cilëve Barça u kishte fituar titullin pikërisht nëpërmjet triumfit në El Clasico.
Vetë Yamal, 18 vjeç, tashmë ka fituar tre tituj kampioni në La Liga një arritje që asnjë lojtar tjetër në historinë e Barcelonës nuk e ka realizuar në atë moshë.