Rivaliteti i jashtëzakonshëm mes Cristiano Ronaldos dhe Lionel Messit mund të ketë pasur dikur edhe një dimension të pazakontë, të lidhur me besimin fetar të yllit portugez.

Revista italiane “Maria con Te”, pjesë e Gruppo Editoriale San Paolo, i ka kushtuar kopertinën Cristiano Ronaldos dhe Georgina Rodríguez, ndërsa brenda saj sjell një episod që pretendohet se ka ndodhur në verën e vitit 2014.

Sipas revistës, më 13 korrik 2014, ndërsa Argjentina përgatitej të luante kundër Gjermanisë në finalen e Kupës së Botës në Brazil, Ronaldo iu drejtua në lutje Zojës së Fatimes.

Por kërkesa që i atribuohet portugezit ishte e pazakontë. Revista pretendon se CR7 dëshironte që Argjentina e Lionel Messit të mos shpallej kampione e botës.

Finalja përfundoi pikërisht me humbjen e Argjentinës. Pas 90 minutave pa gola, Mario Götze realizoi në minutën e 113-të të kohës shtesë, duke i dhënë Gjermanisë fitoren 1-0 dhe titullin e katërt botëror.

Historia është sjellë nga revista në kontekstin e besimit katolik të Ronaldos dhe lidhjes së tij me Fatimen, një prej vendeve më të rëndësishme të pelegrinazhit katolik në Portugali.

Vetë Ronaldo ka folur publikisht edhe për raportin e tij me fenë. Në një deklaratë të cituar nga revista, ai tregonte se frekuenton kishën çdo javë dhe se lutjet e tij lidhen kryesisht me mirënjohjen ndaj Zotit dhe mbrojtjen e familjes e miqve.

“Unë shkoj në kishë çdo javë dhe gjithmonë e falënderoj Zotin për gjithçka që më jep. Nuk i kërkoj asgjë, thjesht e falënderoj që mbron familjen dhe miqtë e mi. Unë jam katolik, kështu që përpiqem gjithmonë ta falënderoj Atë për gjithçka që kam”, citohet Ronaldo.

Revista ndalet gjithashtu te lidhja e tij me shenjtëroren e Fatimes, një përkushtim që, sipas saj, Ronaldo e ka trashëguar edhe nga nëna.

Në kopertinën e botimit, Ronaldo shfaqet së bashku me Georgina Rodríguez në Fatima, ndërsa revista e paraqet vizitën e çiftit në shenjtërore si një tjetër dëshmi të rëndësisë që besimi katolik ka në jetën personale të futbollistit portugez.

Megjithatë, pretendimi se Ronaldo është lutur posaçërisht për humbjen e Messit dhe Argjentinës para finales së vitit 2014 paraqitet nga revista si një episod i raportuar prej saj dhe jo si një deklaratë e drejtpërdrejtë e Ronaldos.