Sporti shqiptar është në zi pas ndarjes nga jeta të një prej figurave më të shquara të volejbollit kombëtar. Kreshnik Tartari, trajneri dhe strategu që shkroi historinë e volejbollit shqiptar në arenën ndërkombëtare, është shuar pas një beteje të gjatë me një sëmundje të rëndë.
Lajmi i hidhur është bërë i ditur nga miq, ish-lojtarë dhe bashkëpunëtorë të tij ndër vite. Tartari ndërroi jetë në San Marino, duke lënë pas një trashëgimi të jashtëzakonshme që e vendos mes emrave më të rëndësishëm të sportit shqiptar.
Karriera e tij lidhet ngushtë me sukseset historike të ekipit të volejbollit të femrave të “Dinamos”, të cilin e udhëhoqi drejt rezultateve që mbeten ende sot ndër arritjet më të mëdha të sportit shqiptar. Nën drejtimin e tij, skuadra arriti të renditej mes katër ekipeve më të mira të Evropës dhe më pas të fitonte medaljen e bronztë në Kupën e Kampioneve të Evropës, një sukses që vazhdon të mbetet unik për klubet shqiptare.
Përveç dominimit në arenën kombëtare me tituj të shumtë kampionë dhe trofe të fituar, Tartari drejtoi edhe Kombëtaren e Shqipërisë në volejboll për femra, duke e bërë atë konkurruese përballë disa prej fuqive më të mëdha të kontinentit.
Për kontributin e tij të çmuar në sport, ai është vlerësuar me titujt “Mjeshtër i Merituar i Sportit” dhe “Mjeshtër i Madh”, ndërsa emri i tij do të mbetet përgjithmonë i lidhur me periudhën më të artë të volejbollit shqiptar.
Me largimin e Kreshnik Tartarit, sporti shqiptar humbet jo vetëm një trajner të madh, por edhe një personalitet që ndikoi në formimin e brezave të tërë sportistësh dhe në ngritjen e emrit të Shqipërisë në skenën evropiane.